اسلام آباد کی مقامی عدالت میں پی ٹی آئی رہنما فواد چوہدری کے خلاف کیس میں پولیس نے تاحال چالان پیش نہیں کیا، عدالت نے ریمارکس دیے کہ 14روز گزرنے کے باوجود چالان کیوں جمع نہیں ہوسکا؟
اسلام آبادڈسٹرکٹ اینڈ سیشن کورٹ میں مجسٹریٹ وقاص احمد راجہ نے الیکشن کمیشن کے خلاف بیان دینے کے کیس کی سماعت کی۔
فواد چوہدری اپنے وکیل علی بخاری اور فیصل چوہدری کے ہمراہ عدالت میں پیش ہوئے۔
فواد چوہدری نے عدالت میں جج سے کہا کہ حاضر ہیں جناب۔
عدالت نے وکلاء سے سوال کیا کہ مقدمے کا چالان جمع ہوا؟
وکیل نے جواب دیا کہ تفتیشی افسر کی جانب سے اب تک مقدمے کا چالان جمع نہیں کروایا جا سکا۔
جج نے استفسار کیا کہ تفتیشی افسر کو بلا لیتے ہیں، 14 روز بعد بھی چالان جمع کیوں نہیں ہوا؟
وکیل علی بخاری نے استدعا کی کہ ہمیں 3 مارچ کے بعد کی تاریخ دے دیں تاکہ استثنیٰ کی درخواست دائر نہ کرنی پڑے۔
