ملک بھر میں یوم شہادت حضرت علی علیہ السلام مذہبی جوش و جذبے سے منایا جارہا ہے، اس دوران سیکیورٹی ہائی الرٹ ہے اور کسی بھی ناخوشگوار واقعے سے نمٹنے کے لیے فورسز کے اہلکاروں کی بڑی نفری تعینات کی گئی ہے۔
کراچی میں یوم علی علیہ السلام کا مرکزی جلوس برآمد ہوچکا ہے، جلوس میں سیکیورٹی کے بھی سخت انتظامات کیے گئے ہیں۔
کراچی میں یوم علی علیہ السلام کا مرکزی جلوس نشترپارک سے برآمد ہوکر اپنے مقررہ راستوں سے ہوتا ہوا کھارادر حسینیہ ایرانیاں پہنچ کر اختتام پذیر ہوگا، جلوس میں سیکیورٹی کے بھی سخت انتظامات کیے گئے ہیں۔
وزیراعلٰی سندھ سید مراد علی شاہ نے کہا ہے کہ ہمیں حضرت علی علیہ السلام کے کردار و افکار کو اپنانا ہوگا تاکہ معاشرے میں عدل و انصاف قائم ہو، انہوں نے آج کے حوالے سے خصوصی ہدایت دی کہ یوم علی علیہ السلام کے موقع پر صوبے بھر میں سیکیورٹی کے فول پروف انتظامات کیے جائیں۔
یومِ شہادتِ حضرت علی علیہ السلام پر وزیر اعلیٰ سندھ سید مراد علی شاہ نے خصوصی پیغام جاری کرتے ہوئے کہا کہ حضرت علی علیہ السلام کی شہادت حق، عدل اور انسانیت کے لیے عظیم قربانی ہے، مولائے کائنات حضرت علی علیہ السلام کا طرزِ حکمرانی دنیا کے تمام حکمرانوں کے لیے مشعلِ راہ ہے اور امام کی عدل و شجاعت کی تعلیمات پر عمل پیرا ہوکر ہم ایک بہتر معاشرہ تشکیل دے سکتے ہیں۔
انہوں نے کہا کہ یومِ علی علیہ السلام ہمیں تقویٰ، شجاعت اور قربانی کا درس دیتا ہے، حضرت علی علیہ السلام نے ہمیشہ حق و صداقت کا ساتھ دیا، ہمیں بھی انہی اصولوں پر چلنے کی ضرورت ہے، ان کی حیات طیبہ میں ہمارے لیے حکمرانی اور عدل و انصاف کا بہترین نمونہ موجود ہے، شہادتِ امام علی علیہ السلام ہمیں ایثار، صبر اور عدل کی راہ پر چلنے کا درس دیتی ہے۔
لاہور میں یوم شہادت حضرت علی علیہ السلام کا جلوس مبارک حویلی سے برآمد ہو کر روایتی راستوں پرگامزن ہے، جلوس مقررہ راستوں سے ہوتا ہوا کربلا گامے شاہ پہنچ کر اختتام پذیرہوگا۔
زائرین سنہری مسجد رنگ محل چوک میں نماز ظہرین ادا کریں گے، زائرین کے لیے سکیورٹی کے فول پروف انتظامات کئے گئے ہیں۔
لاہور میں مرکزی عزاداری جلوسوں اور مجالس کی سیکیورٹی پر 8 ہزار اہلکار تعینات ہیں ، عزاداروں کے داخلے کے لیے واک تھرو گیٹس نصب ہیں۔
مرکزی روٹ پر شرکاکی گاڑیوں کی پارکنگ کے لیے 8 مقامات مختص کیے گئے ہیں۔ عزاداروں کو 3 درجاتی حصار پر مبنی سیکیورٹی میکنزم سے مکمل چیکنگ کے بعد ہی جلوسوں میں شامل ہونے کی اجازت دی جارہی ہے۔
