پاکستان کرکٹ بورڈ (پی سی بی) نے ملک بھر میں طلباء کے لیے ایک بڑے ٹیلنٹ ہنٹ پروگرام کا آغاز کر دیا ہے۔ چیئرمین پی سی بی محسن نقوی نے “ٹیلنٹ ہنٹ پروگرام برائے اسکولز 2025-26” کا باقاعدہ افتتاح لاہور کے ایک مقامی اسکول میں کیا، جہاں اس موقع پر ٹورنامنٹ کی ٹرافی کی بھی رونمائی کی گئی۔
اس موقع پر گفتگو کرتے ہوئے چیئرمین پی سی بی محسن نقوی نے کہا ہے کہ ٹیلنٹ ہنٹ پروگرام ملک بھر کے تمام صوبوں میں بیک وقت شروع ہو رہا ہے، جس میں ملک بھر سے 391 اسکولز حصہ لے رہے ہیں۔ ٹیلنٹ ہنٹ پروگرام میں 175 سرکاری اسکولز جبکہ 218 نجی اسکولز شامل ہیں۔
انہوں نے کہا کہ ہمارا مقصد یوتھ سے نئے کرکٹ اسٹارز کی تلاش ہے، اُمید ہے کہ ٹورنامنٹ سے نئے کھلاڑی سامنے آئیں گے جو پاکستان ٹیم میں شامل ہوکر ملک کا نام روشن کریں گے۔
محسن نقوی کا کہنا ہے کہ میں نے بھی اسی اسکول سے تعلیم حاصل کی۔ اس اسکول سے بہت سی یادیں وابستہ ہیں، خوشی ہے کہ اسی اسکول سے ٹورنامنٹ کا آغاز ہو رہا ہے۔
چیئرمین پی سی بی نے کہا کہ طلباء کو تعلیم کے ساتھ ساتھ پیشہ ورانہ کرکٹ میں کیریئر بنانے کا موقع ملے گا اور اس سطح سے نیا ٹیلنٹ سامنے آئے گا جس سے پاکستان کرکٹ کو فائدہ ہو گا۔
چیئرمین پی سی بی کے مطابق بہترین کارکردگی دکھانے والے کھلاڑیوں کو انڈر 15، انڈر 17 اور انڈر 19 ریجنل ٹیموں کے ساتھ ساتھ کرکٹ اکیڈمیوں میں بھی شامل کیا جائے گا تاکہ انہیں مزید تربیت اور مواقع فراہم کیے جا سکیں۔
