ایشیا کپ میں پاک بھارت میچ کے بعد پریزینٹیشن کے دوران متنازع سیاسی بیانات دینے پر بھارتی کپتان سوریا کمار یادیو مشکل میں پڑ گئے ہیں۔ بھارتی میڈیا کے مطابق پاکستان کرکٹ بورڈ (پی سی بی) کی شکایت پر انٹرنیشنل کرکٹ کونسل (آئی سی سی) نے معاملے کا نوٹس لیتے ہوئے ان کے خلاف کارروائی کا عندیہ دے دیا ہے۔
رپورٹس کے مطابق آئی سی سی اس وقت پاکستان کی جانب سے جمع کرائی گئی شکایت اور شواہد کا جائزہ لے رہا ہے، جس پر جلد سماعت ہوگی۔ ذرائع کے مطابق ابتدائی جانچ کے بعد سوریا کمار یادیو کے خلاف کارروائی کی سفارش بھی کی گئی ہے۔
یاد رہے کہ گروپ اسٹیج میں پاکستان کے خلاف میچ کے بعد بھارتی کپتان نے پریزینٹیشن کے دوران سیاسی جملے کسے تھے، جس پر پاکستان کرکٹ بورڈ نے باضابطہ طور پر آئی سی سی میں شکایت درج کرائی تھی۔
اس معاملے کو آئی سی سی میچ ریفری رچی رچرڈسن دیکھ رہے ہیں جنہوں نے بھارتی ٹیم مینجمنٹ کو اس حوالے سے ای میل بھیج دی ہے۔
