کراچی:شہرِ قائد میں پولیس نے مختلف علاقوں میں کارروائیاں کرتے ہوئے متعدد ڈکیت گروہوں کے کارندوں کو زخمی حالت میں گرفتار کر لیا جبکہ ایک ڈاکو فائرنگ کے تبادلے میں ہلاک ہو گیا۔ کارروائیوں کے دوران پولیس نے بھاری مقدار میں اسلحہ، موبائل فونز، نقدی، قیمتی گھڑیاں، موٹرسائیکلیں اور چوری شدہ سفید کرولا کار بھی برآمد کی۔
گڈاپ سٹی اور فیروزآباد
گڈاپ سٹی، فیروزآباد اور اینٹی وہیکل لفٹنگ سیل کی ٹیموں نے منگل اور بدھ کی درمیانی شب مختلف مقامات پر مبینہ پولیس مقابلوں کے بعد پانچ ڈاکوؤں کو زخمی حالت میں گرفتار کیا۔ گڈاپ سٹی میں بقائی ٹول پلازہ کے قریب فضل واحد اور ذاکر اللہ نامی ڈاکو گرفتار ہوئے جن کے قبضے سے اسلحہ اور گلشن معمار سے چھینی گئی موٹرسائیکل برآمد ہوئی۔ فیروزآباد میں شہید ملت روڈ پر فرحاد اور عثمان نامی ڈاکو زخمی حالت میں پکڑے گئے جن کے قبضے سے بھی اسلحہ، نقدی اور موٹرسائیکل برآمد ہوئی۔
شریف آباد
شریف آباد میں گاڑیاں چوری کرنے والے سیل نے ایک کار لفٹر محمد سلیم عرف ملک کو گرفتار کیا جو گینگ وار کا اہم کارندہ اور سابقہ ریکارڈ یافتہ نکلا۔ اس کے قبضے سے 2022 میں چوری کی گئی سفید کرولا کار (اے ڈی ای۔333) برآمد ہوئی۔
کورنگی
کورنگی چکرا گوٹھ کے علاقے نورانی بستی میں شہریوں نے ڈکیتی کی کوشش کرنے والے دو مبینہ ڈاکوؤں کو پکڑ کر تشدد کا نشانہ بنایا۔ واقعے کے دوران فائرنگ سے ایک ڈاکو موقع پر ہلاک جبکہ دوسرا زخمی ہوا۔ دونوں کو جناح اسپتال منتقل کیا گیا۔ ہلاک اور زخمی ڈاکوؤں کی فوری شناخت نہیں ہو سکی جبکہ زمان ٹاؤن پولیس نے تفتیش شروع کر دی ہے۔
ڈیفنس
ساحل پولیس نے ڈیفنس فیز 8 کے قریب کارروائی کرتے ہوئے پانچ رکنی ڈکیت گینگ کے چار کارندوں کو گرفتار کیا جن میں انیس ولیم، امجد خلیل، سونو کھوکھر اور زیشان علی شامل ہیں، جبکہ ان کا پانچواں ساتھی ذیشان حیدر فرار ہو گیا۔ ملزمان کے قبضے سے غیر قانونی پستول، موبائل فونز، قیمتی گھڑیاں، بریسلٹ اور شناختی کارڈ برآمد کیے گئے۔ پولیس کے مطابق گرفتار ملزمان نے شہر کے مختلف علاقوں میں اسٹریٹ کرائم اور ڈکیتیوں میں ملوث ہونے کا اعتراف کیا ہے۔
