پشاور:گورنر خیبرپختونخوا فیصل کریم کنڈی نے وزیراعلیٰ سہیل آفریدی کو صوبے میں گورننس کی بہتری کے لیے بھرپور تعاون کی پیشکش کر دی۔ انہوں نے کہا کہ حکومت اور اپوزیشن کو عوامی مفاد میں مل کر آگے بڑھنا ہوگا۔
میڈیا سے گفتگو کرتے ہوئے گورنر فیصل کریم کنڈی نے کہا کہ علی امین گنڈاپور کے جانے پر جتنی خوشی تحریک انصاف میں ہے، اتنی اپوزیشن میں نہیں۔ ان کا کہنا تھا کہ بہت جلد تحریک انصاف خود ’’یوم نجات‘‘ منائے گی۔
انہوں نے الزام لگایا کہ علی امین گنڈاپور وفاق کے ساتھ تعلقات خراب کرنا چاہتے تھے، وہ باہر بڑے بیانات دیتے تھے مگر اندرون خانہ حکومت کے ساتھ ملے ہوئے تھے۔ گورنر نے کہا کہ جلد موجودہ حکومت کو اندازہ ہو جائے گا کہ علی امین نے کہاں کہاں غلطیاں کیں۔
فیصل کریم کنڈی نے مزید کہا کہ وزیراعلیٰ کو مکمل بریفنگ دی جا رہی ہے اور چند دنوں میں صورتحال واضح ہو جائے گی۔ وزیراعلیٰ جہاں گورنر ہاؤس یا اپوزیشن کی مدد کے خواہاں ہوں گے، مثبت انداز میں تعاون فراہم کیا جائے گا۔
ان کا کہنا تھا کہ صوبے میں قیام امن کے لیے وزیراعلیٰ کا جرگہ تشکیل دینا ایک خوش آئند قدم ہے۔ سہیل آفریدی کو چاہیے کہ وہ سب سے پہلے پارلیمنٹ کو اعتماد میں لیں، پارلیمانی جرگہ تشکیل دے کر ہر ضلع کا دورہ کریں اور اس جرگے میں اپوزیشن سمیت تمام سیاسی جماعتوں کو شامل کریں تاکہ امن و امان کے قیام اور گورننس میں بہتری لائی جا سکے۔
