وفاقی حکومت نے سونے کی قانونی تجارت کو بحال کرتے ہوئے اس کی درآمد اور برآمد پر عائد پابندی ختم کرنے کا فیصلہ کر لیا ہے۔ وفاقی کابینہ کی منظوری کے بعد وزارتِ تجارت نے باضابطہ نوٹیفکیشن جاری کر دیا ہے، جس میں واضح کیا گیا ہے کہ سونے کی عالمی تجارت کے حوالے سے معطل کیا گیا ایس آر او دوبارہ نافذ العمل ہو گیا ہے، جس کے نتیجے میں سونے کی سرکاری سطح پر درآمد اور برآمد کا عمل دوبارہ شروع ہوسکے گا۔
نوٹیفکیشن کے مطابق حکومت نے قیمتی دھاتوں اور زیورات کی درآمد و برآمد سے متعلق چند ترامیم بھی متعارف کرائی ہیں، تاہم سونے اور دیگر قیمتی دھاتوں کی تجارت کے موجودہ فریم ورک کو برقرار رکھا گیا ہے۔ حکام کا کہنا ہے کہ یہ فریم ورک مزید شفاف اور مضبوط بنایا جائے گا تاکہ تجارتی سرگرمیوں میں خودکار نظام کے ذریعے بہتری آئے اور سونے کی قانونی تجارت زیادہ محفوظ اور موثر انداز میں جاری رہ سکے۔
واضح رہے کہ رواں سال مئی میں سونے کی درآمد اور برآمد پر پابندی اس وقت عائد کی گئی تھی جب سونے کی غیر قانونی اسمگلنگ سے متعلق متعدد شکایات سامنے آئی تھیں۔ وزارتِ تجارت نے 6 مئی 2025 کو جاری کیے گئے حکم نامے کے تحت سونے کی تجارت کو ریگولیٹ کرنے والے ایس آر او کو 60 روز کے لیے معطل کر دیا تھا۔
ذرائع کے مطابق حکومت نے اسمگلنگ کے خدشات کو کم کرنے اور تجارتی نگرانی کو بہتر بنانے کے لیے یہ عارضی اقدام اٹھایا تھا۔ اب پابندی کے خاتمے کے بعد توقع ہے کہ سونے کی درآمد و برآمد کی قانونی سرگرمیاں نہ صرف بحال ہوں گی بلکہ پہلے سے زیادہ آسان اور باقاعدہ نظام کے تحت آگے بڑھ سکیں گی۔
