اسلام آباد: نیشنل الیکٹرک پاور ریگولیٹری اتھارٹی نے ملک بھر میں بجلی کے نرخوں میں اضافہ کرتے ہوئے یکم جنوری سے فی یونٹ بجلی کی قیمت ایک روپے 79 پیسے بڑھانے کا فیصلہ کر لیا ہے، جس سے صارفین پر مزید مالی بوجھ پڑنے کا امکان ہے۔
نیپرا کی جانب سے یہ فیصلہ وفاقی حکومت کو بھجوا دیا گیا ہے، جس کا اطلاق وفاقی حکومت کی منظوری کے بعد عمل میں آئے گا۔ اس وقت ملک میں فی یونٹ بجلی کا اوسط بنیادی نرخ 31 روپے 59 پیسے نافذ العمل ہے۔
دوسری جانب نیپرا نے بجلی صارفین کے لیے محدود ریلیف کا اعلان بھی کیا ہے، جس کے تحت فی یونٹ بجلی 93 پیسے سستی کی گئی ہے۔ اس حوالے سے نیپرا نے باقاعدہ اعلامیہ جاری کیا ہے، جس میں بتایا گیا ہے کہ یہ کمی نومبر کی فیول پرائس ایڈجسٹمنٹ کی مد میں کی گئی ہے۔
نوٹیفکیشن کے مطابق اس ریلیف کا اطلاق کراچی سمیت ملک بھر کے صارفین پر جنوری کے بجلی کے بلوں میں ہوگا، تاہم لائف لائن صارفین اس سہولت سے مستثنیٰ ہوں گے۔
