نائیجیریا سے تعلق رکھنے والی خاتون فیور اوگوچے اینی نے مسلسل 70 دن تک بلند آواز میں گنتی گن کر ایک نیا عالمی ریکارڈ قائم کر دیا ہے۔ انہوں نے ایک طویل چیلنج کے دوران ایک سے لے کر 10 لاکھ 70 ہزار تک گنتی مکمل کی۔
غیر ملکی میڈیا رپورٹس کے مطابق فیور اوگوچے اینی نے کئی ہفتوں تک مسلسل گنتی گننے کا عمل جاری رکھا اور اس دوران انہوں نے تقریباً 18 سال پرانا عالمی ریکارڈ توڑ دیا۔
تفصیلات کے مطابق انہوں نے روزانہ تقریباً 14 گھنٹے گنتی گننے میں صرف کیے اور مسلسل 70 دن تک اس عمل کو جاری رکھتے ہوئے ایک سے لے کر 10 لاکھ 70 ہزار تک اعداد بلند آواز میں گن کر اپنا ہدف مکمل کیا۔
اس سے قبل گنتی کا عالمی ریکارڈ 10 لاکھ تک گنتی کرنے کا تھا جو تقریباً 18 برس تک قائم رہا۔ فیور اوگوچے اینی نے اس حد سے مزید 70 ہزار اعداد آگے جا کر ایک نیا ریکارڈ قائم کیا۔
شفافیت اور تصدیق کو یقینی بنانے کے لیے انہوں نے گنتی کے پورے عمل کو یوٹیوب پر براہ راست نشر کیا، جس کے ذریعے ناظرین کو اس کوشش کو براہ راست دیکھنے اور اس کی صداقت کی تصدیق کرنے کا موقع ملا۔
یہ چیلنج اکتوبر 2025 میں شروع ہوا اور دسمبر تک جاری رہا۔ اس دوران زیادہ تر وقت فیور اوگوچے اینی نے اپنے گھر سے ہی گنتی کا عمل جاری رکھا اور تقریباً ڈھائی ماہ تک ایک باقاعدہ اور مسلسل شیڈول برقرار رکھا۔
ان کی غیر معمولی برداشت، مستقل مزاجی اور محنت نے سوشل میڈیا پر بھی خاصی توجہ حاصل کی اور اس کارنامے کو برداشت اور عزم سے متعلق غیر معمولی ریکارڈز کی ایک نئی مثال قرار دیا جا رہا ہے۔
