کراچی: محکمہ موسمیات نے بتایا ہے کہ کراچی میں موسم مزید سرد ہونے کا امکان ہے، جبکہ کل شہر میں ہلکی بارش بھی ہو سکتی ہے، جس سے سردی کی شدت میں مزید اضافہ متوقع ہے۔
محکمہ موسمیات کے مطابق شہر میں ہوا میں نمی کا تناسب 76 فیصد ریکارڈ کیا گیا ہے، جبکہ منگل سے بدھ کے درمیان مغربی ہواؤں کا ایک سسٹم کراچی پر اثر انداز ہو سکتا ہے، جو موسم کی صورتحال میں تبدیلی کا باعث بنے گا۔
محکمے کے مطابق اس وقت شمال مشرق کی سمت سے ہلکی رفتار سے ہوائیں چل رہی ہیں، جبکہ آج شہر میں زیادہ سے زیادہ درجہ حرارت 26 سے 28 ڈگری سینٹی گریڈ کے درمیان رہنے کا امکان ظاہر کیا گیا ہے۔
کراچی میں کم سے کم درجہ حرارت 12 ڈگری سینٹی گریڈ ریکارڈ کیا گیا ہے، اور آئندہ 24 گھنٹوں کے دوران دن کے وقت موسم خشک جبکہ رات کے اوقات میں سرد رہنے کی توقع ہے۔
ترجمان محکمہ موسمیات انجم نذیر نے بتایا کہ کراچی میں 30 دسمبر کی رات گئے ہلکی بارش کا امکان موجود ہے، جبکہ حیدرآباد، بدین، ٹھٹہ، میرپورخاص اور تھرپارکر کے بعض علاقوں میں بارش کا سلسلہ جاری رہے گا۔
انہوں نے مزید کہا کہ ملک کے مختلف حصوں میں بارش کا یہ سلسلہ 2 جنوری تک برقرار رہنے کا امکان ہے، جبکہ پنجاب کے میدانی علاقوں میں بھی بارش متوقع ہے۔
ترجمان کے مطابق خیبرپختونخوا کے بالائی علاقوں میں برفباری کی شدت نسبتاً زیادہ ہو سکتی ہے، جس کے باعث سردی میں مزید اضافہ ہوگا۔
