امریکی صدارتی انتخابات کے لیے کل ووٹنگ کی گنتی کا عمل شروع ہوگا وہیں شہریوں کے ووٹ کاسٹ کرنے کے لیے مختلف اور غیر معمولی مقامات پر پولنگ اسٹیشنز قائم کیے گئے ہیں۔
امریکی اخبار نیویارک ٹائمز کل ہونے والے انتخابات کے لیے بنائے گئے ایسے ہی چند پولنگ اسٹیشنز کی فہرست سامنے لایا ہے۔
پہلے کپڑے دھوئیں پھر ووٹ ڈالیں
شکاگو شہر کے شکاگو لان میں ووٹنگ کے لیے کوئی مخصوص عمارت موجود نہیں ہے جس کی وجہ سے پولنگ بوتھ کی جگہ ایک لانڈری ایریا میں بنا دی گئی ہے۔ جہاں مقامی افراد کے لیے اپنا ووٹ ڈالنا انتہائی آسان ہوگا۔ اس طرح لوگ اپنے کپڑے بھی دھو سکیں گے اور ووٹ بھی ڈال سکیں گے۔
لانڈری کے منیجر کا اس حوالے سے کہنا ہے کہ یہ فیصلہ کاروبار کے لیے بھی مفید ہے، یہاں پولنگ اسٹیشن بنانے سے ہمارا کاروبار چلے گا، بس کبھی کبھی مشکل ہوجاتی ہے جب لوگ ووٹر آئی ڈی طلب کرنے پر عادتاً اپنا لانڈری کارڈ دکھا دیتے ہیں۔
اس کے علاوہ امریکی انتخابات کے لیے پولنگ اسٹیشن کافی کیفے، فلائٹ اسکولز اور گیمنگ کلب میں بھی قائم کیے گئے ہیں۔
خیال رہے امریکا میں کل صدارتی انتخابات کے لیے ووٹنگ ہوگی جس میں حصہ لینے کے لیے تقریباً 16 کروڑ افراد اہل ہیں۔
