نوشہرہ سربراہ پاکستان تحریک انصاف پارلیمنٹیرینز پرویز خٹک نے اڈیالہ جیل میں قید سابق وزیر اعظم پر تنقید کرتے ہوئے انہیں فرعون قرار دے دیا۔
پرویز خٹک نے جلسے سے خطاب میں کہا کہ سربراہ پی ٹی آئی کا منشور جھوٹ پر مبنی تھا، وہ فرعون ہے اور میں ہی اس کی فرعونیت ختم کروں گا۔
انہوں نے کہا کہ سربراہ پی ٹی آئی کو نجات دہندہ سمجھنے والوں کو اصل چہرہ نظر آگیا، صحت کارڈ اور تعلیمی اصلاحات میں سربراہ پی ٹی آئی کا کوئی کردار نہیں تھا، خیبر پختونخوا میں اصلاحات اور ترقیاتی کام میری وجہ سے ہوئے۔
چند روز قبل، بونیر میں شمولیتی جلسے سے خطاب میں پرویز خٹک نے کہا تھا کہ سربراہ پی ٹی آئی کا رویہ منتخب ارکان کے ساتھ فرعون جیسا تھا، وہ عوامی وزیر اعظم نہیں بلکہ ایک ڈکٹیٹر تھا۔
پرویز خٹک کا کہنا تھا کہ سربراہ پی ٹی آئی کا نئے پاکستان کا پراجیکٹ ڈرامہ تھا، ان کا تبدیلی کیلیے لگایا نعرہ ڈھونگ نکلا، سابق حکمرانوں نے 70 سال سے عوام کو دھوکے میں رکھا اور ملک کو قرضوں کے دلدل میں دھکیل دیا۔
گزشتہ روز پریس کانفرنس کرتے ہوئے پرویز خٹک نے بیرسٹر گوہر علی خان کے بلامقابلہ چیئرمین پی ٹی آئی منتخب ہونے پر اپنے ردعمل کا اظہار کیا تھا۔
ان کا کہنا تھا کہ بیرسٹر گوہر کو میں نے پی ٹی آئی میں ڈیڑھ سال پہلے شامل کروایا تھا، ان کی عزت کرتا ہوں وہ میرا وکیل بھی رہا ہے لیکن چیئرمین کیلیے کوئی سینئر رہنما لاتے تو اچھا ہوتا۔
