ٹی وی اور فلم انڈسٹری کی معروف اداکارہ ثروت گیلانی نے ایک حالیہ انٹرویو میں فلم جوانی پھر نہیں آنی کی ٹیم کے غیر پیشہ ورانہ رویے پر کھل کر اظہارِ خیال کیا اور پروڈکشن ٹیم کو شدید تنقید کا نشانہ بنایا۔
فلم جوانی پھر نہیں آنی اور اس کے سیکوئل میں اداکاری کرنے والی ثروت گیلانی نے کہا کہ وہ اس فرنچائز کی تیسری فلم میں کام کرنے سے انکار کر چکی ہیں۔ ان کے مطابق اگرچہ وہ ندیم بیگ، ہمایوں سعید اور احمد علی بٹ کو پسند کرتی ہیں، تاہم وہ دوبارہ ’گُل‘ کا کردار ادا نہیں کرنا چاہتیں۔
اداکارہ نے انکشاف کیا کہ جوانی پھر نہیں آنی 2 کی پروموشن کے دوران ٹیم نے ان کے ساتھ غیر پیشہ ورانہ رویہ اختیار کیا۔ ثروت نے بتایا کہ انہوں نے خود لندن جانے کے لیے اپنی بکنگ کرائی تھی، مگر ٹیم کی جانب سے کوئی جواب یا تصدیق نہیں کی گئی، جس سے انہیں محسوس ہوا کہ ان کے ساتھ ناانصافی ہوئی ہے اور انہیں کام نکلنے کے بعد استعمال کر کے ایک طرف کردیا گیا ہے۔
اداکارہ نے مزید کہا کہ دونوں فلموں کے دوران ان کی کئی اہم اداکاری کے مناظر کاٹ دیے گئے، جو ان کے مطابق کسی فنکار کے ساتھ نامناسب سلوک ہے۔ انہوں نے دو ٹوک انداز میں کہا کہ وہ آئندہ اپنی عزتِ نفس اور وقار پر کسی قسم کا سمجھوتہ نہیں کریں گی۔
