ملک بھر میں جاری مون سون بارشوں اور ان کے نتیجے میں آنے والے سیلاب نے شدید تباہی مچائی ہے، جس کے باعث نیشنل ڈیزاسٹر مینجمنٹ اتھارٹی (این ڈی ایم اے) کے مطابق 26 جون سے 13 جولائی تک مختلف حادثات میں 105 افراد اپنی جان کی بازی ہار چکے ہیں۔
رپورٹ کے مطابق جاں بحق ہونے والوں میں 49 بچے، 38 مرد اور 18 خواتین شامل ہیں، جب کہ گزشتہ 24 گھنٹوں کے دوران خانیوال میں ایک شخص جاں بحق ہوا۔
ان بارشوں کے نتیجے میں 211 افراد زخمی بھی ہوئے جن میں 82 بچے، 81 مرد اور 48 خواتین شامل ہیں، جب کہ بنیادی ڈھانچے کو بھی شدید نقصان پہنچا ہے۔
این ڈی ایم اے کے مطابق ملک کے مختلف علاقوں میں دس کلومیٹر سے زائد سڑکیں اور نو پل متاثر ہوئے ہیں۔ اس کے علاوہ 145 گھر مکمل طور پر تباہ ہو چکے ہیں جبکہ 310 مکانات کو جزوی نقصان پہنچا ہے۔
حکام کی جانب سے امدادی کارروائیاں جاری ہیں، تاہم متاثرہ علاقوں میں حالات بدستور تشویشناک ہیں۔
