پاکستان تحریک انصاف کے رہنما شبلی فراز کی نااہلی کے بعد خالی ہونے والی سینیٹ کی نشست پر الیکشن کے لیے پی ٹی آئی کے امیدوار عرفان سلیم نے کاغذات نامزدگی جمع کرا دیے۔ کاغذات جمع کرانے کے موقع پر بڑی تعداد میں پی ٹی آئی ورکرز بھی موجود تھے۔ سینیٹ کی اس نشست پر انتخاب 30 اکتوبر کو ہوگا۔
نامزدگی کے بعد میڈیا سے گفتگو کرتے ہوئے عرفان سلیم نے کہا کہ خیبر پختونخوا میں انتقال اقتدار پرامن طریقے سے ہو رہا ہے اور نئے وزیراعلیٰ کی نامزدگی بانی چیئرمین کا فیصلہ ہے۔ ان کا کہنا تھا کہ علی امین گنڈاپور نے پارٹی قیادت کے فیصلے کے مطابق استعفیٰ دیا۔
انہوں نے کہا کہ اگر انتقال اقتدار میں کسی قسم کی رکاوٹ یا تبدیلی کی کوشش کی گئی تو عوام سڑکوں پر نکلے گی اور اپنا فیصلہ خود کرے گی۔ انہوں نے مزید کہا کہ خیبر پختونخوا فارم 45 کی واحد اسمبلی ہے اور عوام کے فیصلے کو روندنے کی کوشش برداشت نہیں کی جائے گی۔
عرفان سلیم نے کہا کہ گورنر غیر قانونی یا غیر آئینی باتوں سے گریز کریں، ان کی آئینی ذمہ داری ہے کہ جب استعفیٰ موصول ہو تو اس پر بروقت فیصلہ کریں۔
