برطانوی ڈپٹی ہائی کمشنر لانس ڈوم نے سندھ کے سینئر وزیر شرجیل انعام میمن سے ملاقات کی جس میں صوبے کی توانائی پالیسی، جاری منصوبوں اور بین الاقوامی شراکت داریوں پر تفصیلی تبادلہ خیال کیا گیا۔
ملاقات کے دوران شرجیل انعام میمن نے بتایا کہ حکومت سندھ توانائی کے مختلف منصوبوں پر تیزی سے کام کر رہی ہے۔ تھر کول، سولر، ونڈ ہائبرڈ اور گھروں کی سولرائزیشن جیسے منصوبے پہلے ہی جاری ہیں جبکہ عالمی بینک کے تعاون سے مزید منصوبے جلد شروع کیے جائیں گے۔
انہوں نے کہا کہ پاکستان اور برطانیہ کے درمیان توانائی کے شعبے میں تعاون کو مزید فروغ دینے کی خواہش ہے۔ سندھ قدرتی وسائل سے مالا مال صوبہ ہے اور حکومت مقامی وسائل کے مؤثر استعمال کو ترجیح دے رہی ہے۔
سینئر وزیر نے مزید بتایا کہ صوبے کو توانائی کے لحاظ سے خود کفیل بنانا حکومت سندھ کا ایک بڑا ہدف ہے۔ ان کا کہنا تھا کہ سندھ میں دنیا کا سب سے بڑا ہاؤسنگ منصوبہ جاری ہے، جس کے تحت 21 لاکھ مکانات سیلاب متاثرین کے لیے تعمیر کیے جا رہے ہیں۔
برطانوی ڈپٹی ہائی کمشنر نے سندھ حکومت کے ترقیاتی منصوبوں کو سراہا اور کہا کہ عوامی فلاح و بہبود کے لیے کیے گئے اقدامات قابلِ تعریف ہیں۔ ملاقات میں برطانوی ہائی کمیشن کی سینئر پولیٹیکل ایڈوائزر ہُدیٰ اکرام بھی شریک تھیں۔ اس موقع پر شرجیل انعام میمن نے معزز مہمانوں کو سندھی لنگی کے تحائف پیش کیے۔
