پاکستان آرمی نے برطانیہ کے شہر ویلز میں ہونے والی عالمی فوجی مشق “کیمبرین پیٹرول 2025” میں اپنی پیشہ ورانہ مہارت اور غیر معمولی کارکردگی کا مظاہرہ کرتے ہوئے گولڈ میڈل اپنے نام کر لیا۔ یہ عالمی سطح کی مشق 3 سے 13 اکتوبر 2025 تک جاری رہی، جس کا 66 واں ایڈیشن اس سال منایا گیا۔ یہ مشق اپنی سخت ترین فوجی تربیتی تقاضوں اور پروفیشنل چیلنجز کے باعث دنیا بھر میں معروف ہے۔
پاک فوج کے شعبہ تعلقات عامہ (آئی ایس پی آر) کے مطابق اس بین الاقوامی مقابلے میں دنیا کے مختلف حصوں سے تعلق رکھنے والی 137 ٹیموں نے 36 ممالک کی نمائندگی کی۔ ان ٹیموں کو انتہائی دشوار گزار اور کٹھن علاقوں سے گزرتے ہوئے 60 کلومیٹر کا فاصلہ 48 گھنٹوں میں طے کرنا ہوتا ہے، ساتھ ہی مخصوص فوجی اہداف کو کامیابی سے مکمل کرنا لازمی ہوتا ہے۔
پاکستان آرمی کی ٹیم، جس کی قیادت کیپٹن محمد سعد نے کی، نے غیر معمولی نظم و ضبط، بھرپور صلاحیتوں اور اعلیٰ پیشہ ورانہ کارکردگی کا مظاہرہ کرتے ہوئے اس سخت مشق میں نمایاں کارکردگی دکھائی اور گولڈ میڈل حاصل کیا۔
آئی ایس پی آر کے ترجمان کے مطابق یہ کامیابی نہ صرف پاکستان آرمی بلکہ پوری قوم کے لیے باعثِ فخر لمحہ ہے۔ انہوں نے کہا کہ پاک فوج نے ہمیشہ اپنی اعلیٰ تربیت، جنگی مہارت اور وطن سے غیر متزلزل وابستگی کا ثبوت دیا ہے اور مستقبل میں بھی اسی عزم کے ساتھ ملک کا نام دنیا بھر میں روشن کرتی رہے گی۔
