لاس اینجلس: ہالی وڈ کی معروف اور آسکر ایوارڈ یافتہ اداکارہ ڈائنا کیٹن 79 سال کی عمر میں انتقال کر گئیں۔ خاندانی ترجمان نے تصدیق کرتے ہوئے بتایا کہ وہ ہفتے کے روز امریکی ریاست کیلیفورنیا میں انتقال کر گئیں۔ ڈائنا کیٹن نے اپنے طویل فنی کیریئر میں کئی یادگار کردار ادا کیے اور مشہور ہدایتکار ووڈی ایلن کے ساتھ متعدد کامیاب فلموں میں کام کیا۔
ڈائنا کیٹن کا اصل نام ڈائنا ہال تھا۔ وہ 1946 میں لاس اینجلس میں پیدا ہوئیں اور چار بہن بھائیوں میں سب سے بڑی تھیں۔ ان کے والد سول انجینئر جبکہ والدہ گھریلو خاتون تھیں، جنہوں نے اپنی تخلیقی صلاحیتوں کے ذریعے اپنی بیٹی پر گہرا اثر چھوڑا۔
اداکاری اور کہانیاں سنانے کا شوق ڈائنا کیٹن کو بچپن ہی سے تھا۔ 1960 کی دہائی کے آخر میں انہوں نے تھیٹر اور ٹیلی ویژن سے اپنے فنی سفر کا آغاز کیا، تاہم انہیں عالمی شہرت اُس وقت ملی جب انہوں نے 1972 میں فرانسس فورڈ کوپولا کی شہرہ آفاق فلم ’دی گاڈ فادر‘ میں کے ایڈمز کا کردار ادا کیا۔ یہ فلم نہ صرف تجارتی لحاظ سے بڑی کامیاب ثابت ہوئی بلکہ اسے اکیڈمی ایوارڈ برائے بہترین فلم سے بھی نوازا گیا۔
ڈائنا کیٹن اپنی منفرد اداکاری، کرشماتی انداز اور مضبوط کرداروں کے باعث ہالی وڈ کی تاریخ میں ایک نمایاں مقام رکھتی تھیں۔
