وفاقی وزیرِ صحت مصطفیٰ کمال نے بریسٹ کینسر ویک کی تقریب سے خطاب کرتے ہوئے اعلان کیا کہ پاک انسٹی ٹیوٹ آف میڈیکل سائنسز (پمز) میں ملک کا پہلا بریسٹ کینسر اسکریننگ سینٹر قائم کر دیا گیا ہے، جہاں خواتین کو مفت تشخیصی سہولیات فراہم کی جائیں گی۔
وزیرِ صحت نے کہا کہ بریسٹ کینسر سے مؤثر طور پر لڑنے کے لیے بروقت تشخیص نہایت اہم ہے، اسی مقصد کے تحت اسکریننگ سینٹر کا قیام عمل میں لایا گیا ہے۔ ان کا کہنا تھا کہ “ہم نہیں چاہتے کہ لوگ پہلے بیمار ہوں اور پھر اسپتال آئیں، یہ سینٹر خواتین کو بیماری لاحق ہونے سے پہلے ہی تشخیص میں مدد فراہم کرے گا۔”
انہوں نے کہا کہ بریسٹ کینسر کے خلاف جنگ صرف علاج سے نہیں بلکہ آگاہی سے جیتی جاتی ہے۔ “ہم نے اپنی ماں، بہن اور بیٹی کو اس موذی مرض سے بچانا ہے۔”
وزیر صحت مصطفیٰ کمال نے طبی عملے سے خطاب کرتے ہوئے کہا کہ “دکھی انسانیت کی خدمت کرنے والوں کے لیے اللہ کے ہاں بڑا اجر ہے۔” انہوں نے اس موقع پر اعلان کیا کہ مستقبل میں ضلعی سطح پر بھی اسکریننگ سینٹرز قائم کیے جائیں گے تاکہ زیادہ سے زیادہ خواتین تک سہولت پہنچ سکے۔
ان کا کہنا تھا کہ خواتین اور بچیوں کو بیماری لاحق ہونے سے پہلے ہی ٹیسٹ کرانا چاہیے، تاکہ علاج کے لیے قیمتی وقت ضائع نہ ہو۔ اس نئی سہولت کے قیام سے ملک بھر میں بریسٹ کینسر کی بروقت تشخیص اور بچاؤ میں مدد ملنے کی توقع ہے۔
