وفاقی آئینی عدالت نے پاکستان تحریک انصاف (پی ٹی آئی) کی درخواست منظور کرتے ہوئے 5 نومبر کے عبوری حکم میں ترمیم کر دی۔ پشاور ہائی کورٹ کو گورنر راج اور ایمرجنسی سے متعلق مقدمات کے سوا آئین کے آرٹیکل 199 کے تحت دیگر مقدمات سننے کی اجازت دے دی گئی۔ عدالت نے پشاور بار کونسل کو بھی کیس میں فریق بننے کی اجازت دی۔
پی ٹی آئی کے وکیل بیرسٹر گوہر علی خان نے کہا کہ 5 نومبر کے حکم سے ہائی کورٹ کی کارروائی متاثر ہوئی۔ عدالت نے سماعت کے دوران کہا کہ حکم امتناع گورنر راج اور امن عامہ برقرار رکھنے کے قانون (ایم پی او) سے متعلق معاملات کے لیے تھا۔ بیرسٹر گوہر نے دفعہ 3 ایم پی او کے تحت بھی ریلیف مانگا۔ چیف جسٹس امین الدین خان نے کہا کہ پشاور رجسٹری میں دائر متفرق درخواستیں بینچ کو موصول ہونے پر دیکھی جائیں گی۔
5 نومبر 2026 کے حکم کے تحت پشاور ہائی کورٹ میں 12 اکتوبر 2026 یا اس کے بعد آرٹیکل 199 کے تحت دائر تمام درخواستوں پر کارروائی معطل کی گئی تھی۔
عدالت نے صوبائی حکومت سے پوچھا تھا کہ کن اضلاع میں فوج کی ضرورت ہے اور کن میں نہیں۔ خیبر پختونخوا حکومت نے جواب میں کہا کہ سول انتظامیہ کی معاونت کے لیے پورے صوبے میں فوج کی مسلسل تعیناتی ضروری ہے اور فی الحال کسی ضلع یا علاقے سے فوج واپس بلانے کا ارادہ نہیں۔ حکومت کے مطابق تعیناتی کا مقصد سول انتظامیہ، انسانی جانوں، سرکاری املاک اور اہم تنصیبات کا تحفظ یقینی بنانا ہے۔


















































































