کراچی کے علاقے گارڈن میں اسپیشل انوسٹی گیشن یونٹ اور سندھ رینجرز نے مشترکہ کارروائی کرتے ہوئے دو مبینہ بھتہ خوروں کو ہلاک کر دیا ہے۔
سندھ رینجرز کے ترجمان کے مطابق ہلاک ہونے والے ملزمان کی شناخت حسن عرف بیلچہ اور تنویر عرف تیتر کے نام سے ہوئی ہے۔ ترجمان نے بتایا کہ دونوں ملزمان کا تعلق بھتہ مافیا کے سرغنہ جمیل چھانگا اور زاہد لاڈلہ گروپ سے تھا۔
ترجمان کے مطابق ملزمان سولجر بازار اور جمشید ٹاؤن کے علاقوں میں بھتہ خوری کی سرگرمیوں میں ملوث تھے اور کاروباری مراکز، دکانداروں، بلڈرز اور ریسٹورنٹس سے بھتہ وصول کرتے تھے۔
بیان میں کہا گیا کہ بھتہ نہ دینے کی صورت میں ملزمان فائرنگ اور خوف و ہراس پھیلانے جیسے جرائم میں بھی ملوث رہے۔ ترجمان کے مطابق دونوں ملزمان اسٹریٹ کرائم کی 300 سے زائد وارداتوں میں بھی ملوث تھے۔
سندھ رینجرز کے ترجمان کا کہنا تھا کہ ہلاک ملزمان عادی مجرم تھے اور متعدد بار مختلف مقدمات میں جیل جا چکے تھے۔
