سندھ کے سینئر وزیر شرجیل انعام میمن نے کہا ہے کہ اسلام آباد میں منعقد ہونے والے ایک بڑے ایونٹ کے ذریعے پاکستان اور اس کے گرین پاسپورٹ کی اہمیت عالمی سطح پر اجاگر ہوئی ہے، جس سے ملک کا مثبت تشخص مضبوط ہوا ہے، انہوں نے صدرِ پاکستان، وزیرِ اعظم اور فیلڈ مارشل کو مبارکباد پیش کرتے ہوئے کہا کہ یہ کامیابی سفارتی سطح پر پاکستان کی برتری کو ظاہر کرتی ہے جبکہ بھارت اس صورتحال پر شدید ردِعمل کا شکار ہے۔
انہوں نے مزید کہا کہ پاکستان دنیا کی واحد اسلامی ایٹمی طاقت ہے اور “معرکۂ حق” کے ذریعے بھی ملک کو کامیابی حاصل ہوئی، جس کے باعث بھارتی میڈیا پریشانی کا شکار دکھائی دے رہا ہے اور خطے میں پاکستان کا مؤقف مضبوط ہوا ہے۔
ڈائریکٹوریٹ آف سوشل اینڈ الیکٹرانک میڈیا کراچی میں پریس کانفرنس سے خطاب کرتے ہوئے انہوں نے بتایا کہ صدر آصف علی زرداری کی زیر صدارت ایک اہم اجلاس منعقد ہوا، جس میں چاروں صوبوں کے وزرائے اعلیٰ نے شرکت کی اور مختلف قومی و ترقیاتی امور پر تفصیلی غور کیا گیا۔
ان کا کہنا تھا کہ پاکستان پیپلز پارٹی کی تاریخ اس بات کی عکاس ہے کہ وہ ہمیشہ عوامی فلاح و بہبود اور بہتر مستقبل کے لیے کام کرتی آئی ہے، جبکہ بینظیر انکم سپورٹ پروگرام کے ذریعے اہم ڈیٹا اکٹھا کیا گیا ہے، جس کی بنیاد پر بڑے پیمانے پر ہاؤسنگ منصوبہ شروع کیا جا رہا ہے، جس کے تحت 21 لاکھ خاندانوں کو گھر فراہم کیے جا رہے ہیں۔
انہوں نے بتایا کہ سندھ حکومت نے بینظیر ہاری کارڈ متعارف کرایا ہے، جبکہ بی آئی ایس پی کے پاس خطِ غربت سے نیچے زندگی گزارنے والے افراد کا مکمل ڈیٹا موجود ہے، جس کی مدد سے مستحق افراد تک سہولیات کی فراہمی کو مؤثر بنایا جا رہا ہے۔
زرعی شعبے کے حوالے سے انہوں نے کہا کہ گندم کی کاشت میں کمی کے پیش نظر حکومت سندھ نے کاشتکاروں کو ڈی اے پی اور یوریا کی بوریاں فراہم کرنے کا اعلان کیا، تاکہ ان کی حوصلہ افزائی کی جا سکے، جبکہ بارشوں سے متاثرہ فصل کے لیے ادویات بھی فراہم کی گئیں، جس کے نتیجے میں اس سال گندم کی پیداوار کو بمپر کراپ قرار دیا گیا ہے اور ملک میں وافر مقدار میں گندم دستیاب ہے۔
انہوں نے مزید بتایا کہ اس وقت گندم کی کٹائی کا عمل جاری ہے اور حکومت سندھ نے تین لاکھ سے زائد چھوٹے کاشتکاروں کو فی ایکڑ 1500 روپے فراہم کیے ہیں، اور یہ اقدام کسانوں کو براہِ راست مالی معاونت دینے کے لیے کیا گیا ہے۔
ٹرانسپورٹ کے شعبے پر بات کرتے ہوئے انہوں نے کہا کہ حکومت سندھ سرکاری اور نجی ٹرانسپورٹ میں مسافروں کے لیے سبسڈی فراہم کر رہی ہے تاکہ کرایوں میں اضافہ نہ ہو اور عوام کو ریلیف مل سکے، جبکہ موٹر سائیکل استعمال کرنے والے 65 لاکھ افراد کے لیے بھی فی کس 2000 روپے کی مالی معاونت کا سلسلہ شروع کیا گیا ہے، جس کی ادائیگی سندھ بینک کے ذریعے کی جا رہی ہے۔
انہوں نے کہا کہ انٹر سٹی اور انٹرا سٹی ٹرانسپورٹ کو بھی سبسڈی دی جا رہی ہے، جبکہ پنک اسکوٹیز پروگرام کا آغاز کراچی سے کیا گیا ہے، اور سکھر و حیدرآباد میں بچیوں کو تربیت دے کر انہیں لائسنس فراہم کیے جا چکے ہیں، جبکہ جلد ہی ان شہروں میں اسکوٹیز کی تقسیم بھی شروع کی جائے گی۔
انہوں نے مزید بتایا کہ شکارپور، سکھر، خیرپور اور حیدرآباد میں پیپلز بس سروس کے نئے روٹس بھی جلد شروع کیے جائیں گے تاکہ عوام کو بہتر سفری سہولیات فراہم کی جا سکیں۔
شرجیل میمن کا کہنا تھا کہ حکومت سندھ کی اولین ترجیح تمام شعبوں کے مسائل کو حل کرنا اور عوام کو زیادہ سے زیادہ ریلیف فراہم کرنا ہے، جبکہ چیئرمین بلاول بھٹو زرداری اور صدر آصف علی زرداری کی ہدایات کے مطابق ہر شعبے میں بہتری کے لیے اقدامات کیے جا رہے ہیں، خاص طور پر صحت کے شعبے میں نمایاں کامیابیاں حاصل ہو رہی ہیں۔
صحت کے حوالے سے انہوں نے کہا کہ پولیو ایک خطرناک بیماری ہے جس سے بچاؤ صرف بروقت ویکسینیشن کے ذریعے ممکن ہے، اسی لیے ایک بھرپور آگاہی مہم شروع کی گئی ہے، اور عوام سے اپیل کی گئی ہے کہ وہ اس پیغام کو زیادہ سے زیادہ پھیلائیں تاکہ ہر بچے کو اس بیماری سے محفوظ رکھا جا سکے۔
ایک سوال کے جواب میں انہوں نے کہا کہ حالیہ صورتحال بھارت کے لیے ایک امتحان ثابت ہوئی ہے جبکہ پاکستان عالمی سطح پر اپنا مثبت کردار مضبوط بنا رہا ہے، اور خارجہ تعلقات کو مزید مستحکم کیا جا رہا ہے تاکہ ملک کو ایک باوقار ریاست کے طور پر پیش کیا جا سکے۔
انہوں نے کہا کہ پاکستان امن کا خواہاں ہے اور عالمی سطح پر ایک امن پسند ریاست کے طور پر پہچانا جاتا ہے جو خطے میں استحکام کا خواہاں ہے۔
ایک اور سوال کے جواب میں انہوں نے بتایا کہ پاکستان کے بیانیے کو عالمی سطح پر مؤثر انداز میں پیش کرنے کے لیے وفاق اور صوبے مل کر کام کر رہے ہیں، جبکہ لندن فیسٹیول میں سندھ حکومت کا پہلا پراجیکٹ “میرا لیاری” پیش کیا جائے گا۔
تیل کی قیمتوں سے متعلق سوال پر انہوں نے کہا کہ قیمتوں میں اضافہ یا کمی عالمی منڈی سے جڑی حقیقت ہے اور حکومت بین الاقوامی حالات کو مدنظر رکھتے ہوئے فیصلے کرتی ہے، جبکہ عوام کو بھی ان حالات کو سمجھتے ہوئے ذمہ داری کا مظاہرہ کرنا چاہیے۔
آخر میں انہوں نے کہا کہ کسی بھی صورت میں کرایوں میں اضافہ نہیں ہونے دیا جائے گا، ٹرانسپورٹرز حکومت کے ساتھ رابطے میں ہیں اور بلاجواز کرایہ بڑھانے کی اجازت نہیں ہوگی، جبکہ متعلقہ حکام کو ہدایت دی گئی ہے کہ مقررہ نرخوں پر عملدرآمد یقینی بنایا جائے اور عوام کو ریلیف فراہم کیا جائے۔
