جرمنی میں برڈ فلو کے بڑھتے ہوئے کیسز کے پیش نظر حکام نے بتایا ہے کہ ملک بھر میں پانچ لاکھ سے زائد فارم پرندوں کو تلف کر دیا گیا ہے تاکہ بیماری کے پھیلاؤ کو روکا جا سکے۔
خبر رساں ادارے اے ایف پی کی رپورٹ کے مطابق قومی ادارہ برائے حیوانی امراض تحقیق، فریڈرش لوئفلر انسٹی ٹیوٹ (ایف ایل آئی) کے مطابق ستمبر سے اب تک 31 مختلف مقامات پر وائرس کے پھیلنے کی تصدیق ہو چکی ہے اور وبا تیزی سے پھیل رہی ہے۔
ادارے کی ترجمان نے کہا کہ صورتحال اتنی تیزی سے تبدیل ہو رہی ہے کہ یہ اعداد و شمار حتمی نہیں بلکہ ایک وقتی جھلک ہیں جن سے پھیلاؤ کی شدت کا اندازہ لگایا جا سکتا ہے۔ جنگلی پرندوں میں اموات کی درست تعداد معلوم نہیں ہو سکی، تاہم مشرقی ریاست برانڈن برگ میں صرف کرینز کی ڈیڑھ ہزار سے زائد اموات کا خدشہ ظاہر کیا گیا ہے۔
برانڈن برگ کے شہر نوٹریبن میں ایک پولٹری فارم پر موجود ایک رپورٹر نے پیر کے روز ہزاروں مردہ مرغیوں کو ٹریلر میں منتقل ہوتے دیکھا جبکہ کنٹینرز سے مردہ بطخوں کو بھی ہٹایا جا رہا تھا۔
سب سے زیادہ متاثرہ ریاست لوئر سیکسنی ہے جہاں آٹھ مختلف مقامات پر وائرس کے پھیلاؤ کی تصدیق ہوئی ہے جبکہ برانڈن برگ اور میکلن برگ ویسٹرن پومیرانیا میں چھ، چھ مقامات پر کیسز رپورٹ ہوئے ہیں۔
اگرچہ برڈ فلو شاذونادر ہی انسانوں کے لیے خطرہ بنتا ہے، لیکن یہ بیماری زرعی صنعت کو بھاری نقصان پہنچا سکتی ہے اور گھریلو اشیائے خور و نوش کی قلت کا سبب بن سکتی ہے۔
