کینیا میں ایک چھوٹا طیارہ گر کر تباہ ہو گیا جس کے نتیجے میں اس میں سوار بارہ افراد کے ہلاک ہونے کا خدشہ ظاہر کیا گیا ہے۔ ابتدائی اطلاعات کے مطابق حادثہ مقامی وقت کے مطابق صبح ساڑھے پانچ بجے پیش آیا۔
کینیا سول ایوی ایشن اتھارٹی کے مطابق یہ طیارہ ساحلی سیاحتی مقام ڈیانی سے روانہ ہوا تھا اور ماسائی مارا نیشنل پارک میں واقع نجی ایئر اسٹرپ کچوا ٹیمبو جا رہا تھا۔ دورانِ پرواز طیارہ اچانک حادثے کا شکار ہو گیا۔
اتھارٹی کے بیان میں کہا گیا کہ طیارے میں بارہ افراد سوار تھے، حادثے کی وجوہات معلوم کرنے کے لیے تحقیقات شروع کر دی گئی ہیں اور متعلقہ سرکاری ادارے جائے وقوعہ پر پہنچ چکے ہیں۔
واضح رہے کہ گزشتہ برس اگست میں بھی نیروبی کے قریب ایک طبی تنظیم امریف کا ہلکا طیارہ گر کر تباہ ہو گیا تھا جس کے نتیجے میں چھ افراد ہلاک اور دو زخمی ہوئے تھے۔
یاد رہے کہ گزشتہ روز امریکی بحریہ کا ایک ہیلی کاپٹر اور ایک لڑاکا طیارہ دو الگ الگ واقعات میں جنوبی بحیرہ چین میں گر کر تباہ ہو گئے تھے۔ بحریہ کے پیسیفک فلیٹ کے مطابق عملے کے تمام پانچ ارکان کو بحفاظت بچا لیا گیا۔ دونوں واقعات کے درمیان آدھے گھنٹے کا وقفہ تھا۔
