پاکستان ٹیلی کمیونیکشن اتھارٹی نے آن لائن نوکری تلاش کرنے والے شہریوں کے لیے انتباہ جاری کیا ہے، جس میں عوام کو آن لائن دھوکہ دہی سے محتاط رہنے کی ہدایت کی گئی ہے۔
پی ٹی اے کی جانب سے جاری اہم پیغام میں کہا گیا ہے کہ سوشل میڈیا پر نوکریوں کی پیشکش ہمیشہ حقیقت پر مبنی نہیں ہوتی اور اکثر ایسے اشتہارات کے ذریعے شہریوں کو جھانسہ دے کر پیسے اور ذاتی معلومات حاصل کی جاتی ہیں۔
ادارے نے خبردار کیا کہ جعل ساز جعلی ملازمت کے اشتہارات کے ذریعے زیادہ تنخواہوں، آسان اوقات کار اور بیرونِ ملک ملازمت کے لالچ سے لوگوں کو نشانہ بناتے ہیں۔ اصل مقصد شہریوں سے رقم بٹورنا اور ان کے ذاتی ڈیٹا تک رسائی حاصل کرنا ہوتا ہے۔
پی ٹی اے کے مطابق سوشل میڈیا پر مختلف ایجنٹس کمپنیوں کے نام پر نوجوانوں کو ملازمت کی پیشکش کرتے ہیں اور سروے یا تحقیق کے بہانے ان کی تصاویر اور لوکیشن حاصل کرتے ہیں، جو بعد میں ملک اور شہریوں کے خلاف منفی سرگرمیوں میں استعمال کی جا سکتی ہیں۔
پیغام میں شہریوں کو ہدایت کی گئی کہ اگر کسی نوکری کی پیشکش غیر معمولی طور پر پرکشش لگے، بھرتی کرنے والا شخص اپنی شناخت چھپائے، صرف واٹس ایپ پر رابطہ کرے، شناختی کارڈ یا گھر کا پتہ جیسی غیر ضروری معلومات مانگے، مشتبہ لنکس یا ایپس ڈاؤن لوڈ کروائے یا لوکیشن طلب کرے تو فوراً محتاط ہو جائیں۔
تحفظ کے لیے پی ٹی اے نے مشورہ دیا کہ ہر نوکری کے اشتہار کی تصدیق کی جائے، کمپنی کی آفیشل ویب سائٹ چیک کی جائے، تصدیق شدہ ای میل یا متعلقہ ایچ آر ڈپارٹمنٹ سے رابطہ کیا جائے۔ شہریوں کو ہدایت کی گئی کہ وہ اپنی ذاتی معلومات غیر مصدقہ ذرائع سے شیئر نہ کریں اور مشکوک اشتہارات کو متعلقہ اداروں کو رپورٹ کریں، کیونکہ خوابوں کی نوکری اہم ضرور ہے لیکن آن لائن تحفظ اس سے کہیں زیادہ ضروری ہے۔
