ڈیرہ اسماعیل خان کے علاقے درابن میں بھارتی حمایت یافتہ دہشتگردوں کے خلاف بہادری سے لڑتے ہوئے جامِ شہادت نوش کرنے والے میجر سبطین حیدر کو وفاقی وزیر داخلہ محسن نقوی نے دلی خراج عقیدت پیش کیا ہے۔ وزیر داخلہ نے اپنے بیان میں کہا کہ شہید میجر سبطین حیدر نے اپنی جان قربان کر کے دشمن کے مذموم عزائم کو خاک میں ملا دیا اور اپنی شجاعت و جرات سے ایک نئی تاریخ رقم کی۔
محسن نقوی کا کہنا تھا کہ شہید میجر سبطین جیسے بہادر سپوتوں پر پوری قوم کو فخر ہے اور ان کی قربانی ہمیشہ یاد رکھی جائے گی۔ انہوں نے کہا کہ قوم ان کی بہادری، جواں مردی اور عزم کو سلیوٹ کرتی ہے۔ وزیر داخلہ نے شہید کے اہلخانہ سے دلی ہمدردی و تعزیت کا اظہار بھی کیا۔
وزیر داخلہ کے مطابق میجر سبطین حیدر نے آپریشن کے دوران 7 بھارتی حمایت یافتہ دہشتگردوں کو انجام تک پہنچایا۔ واضح رہے کہ سیکیورٹی فورسز نے درابن میں انٹیلی جنس بیسڈ آپریشن کے دوران 7 دہشتگردوں کو ہلاک کیا تھا، جب کہ شدید فائرنگ کے تبادلے میں میجر سبطین حیدر بہادری سے اپنی ٹیم کی قیادت کرتے ہوئے جامِ شہادت نوش کر گئے۔
