جامعہ کراچی میں سوشل ورک ڈپارٹمنٹ کی سیکنڈ ایئر کی طالبہ انیقہ سعید پوائنٹ بس کی زد میں آ کر جاں بحق ہو گئیں، جس کے بعد یونیورسٹی میں سوگ اور افسوس کی فضا پھیل گئی۔ پولیس کے مطابق یہ افسوسناک واقعہ اُس وقت پیش آیا جب انیقہ سعید پوائنٹ بس سے اتر رہی تھیں کہ اسی دوران ڈرائیور نے گاڑی ریورس کی اور طالبہ اس کی زد میں آ کر موقع پر ہی دم توڑ گئیں۔
حادثے کی خبر پھیلتے ہی طلبہ کی بڑی تعداد جائے وقوعہ پر جمع ہو گئی اور یونیورسٹی انتظامیہ کے خلاف شدید احتجاج کیا۔ مظاہرین کا کہنا تھا کہ جامعہ کے اندر ٹریفک کا کوئی واضح نظام موجود نہیں ہے، نہ ہی اسپیڈ بریکرز یا سائن بورڈز نصب کیے گئے ہیں، جس کے باعث طلبہ کی جانیں خطرے میں ہیں۔
طلبہ نے جامعہ انتظامیہ سے واقعے کی مکمل تحقیقات کرانے، ٹریفک کنٹرول کے مؤثر اقدامات کرنے اور جاں بحق طالبہ کے اہل خانہ کو مالی معاونت فراہم کرنے کا مطالبہ کیا۔
واقعے کی اطلاع ملتے ہی پولیس اور ریسکیو اداروں کے اہلکار موقع پر پہنچے اور صورت حال پر قابو پانے کی کوشش کی۔ مبینہ ٹاؤن پولیس کے مطابق حادثے میں ملوث پوائنٹ بس کے ڈرائیور کو حراست میں لے لیا گیا ہے۔ تاہم جاں بحق طالبہ کے اہل خانہ نے قانونی کارروائی سے انکار کرتے ہوئے لاش کی فوری حوالگی کا مطالبہ کیا ہے۔ پولیس کا کہنا ہے کہ ورثا سے بات چیت جاری ہے اور واقعے کی تفصیلی رپورٹ مرتب کی جا رہی ہے۔
