کراچی: سابق صدرِ مملکت ڈاکٹر عارف علوی گرفتاری کے خدشے کے باعث سندھ ہائی کورٹ پہنچ گئے اور ضمانت کیلئے درخواست دائر کر دی۔
تفصیلات کے مطابق سابق صدر پاکستان اور پی ٹی آئی کے سینئر رہنما ڈاکٹر عارف علوی گرفتاری کے خدشے کے پیشِ نظر سندھ ہائیکورٹ میں پہنچے ہیں،جہاں انہوں نے ضمانت کیلئے درخواست دائر کی ہے،انہیں تھانہ واہ کینٹ میں چوتھے مقدمے میں نامزد کیا گیا ہے،جس کے بعد انہوں نے عدالت سے حفاظتی ضمانت کی اپیل کی۔
خیال رہے کہ ڈاکٹر عارف علوی اس سے قبل بھی 3 مقدمات میں ضمانت حاصل کر چکے ہیں۔ سندھ ہائیکورٹ نے ان کی حفاظتی ضمانت منظور کرتے ہوئے 20 دن کیلئے ضمانت دی اور 50 ہزار روپے کے مچلکے جمع کرانے کا حکم بھی دیا تھا۔
عدالت نے اپنے حکم میں کہا کہ کیس کی مزید سماعت کیلئے معاملہ آئینی بینچ کو بھیجا جا رہا ہے، جہاں مقدمات کی تفصیلات اور دیگر معاملات کا جائزہ لیا جائے گا۔
عارف علوی کی گرفتاری کے خدشات کے پیش نظر سندھ ہائیکورٹ کی جانب سے حفاظتی ضمانت کی منظوری ایک اہم پیش رفت ہے۔
