ویسٹ انڈیز اور پاکستان کے درمیان جاری پہلے ٹیسٹ میچ کا تیسرا روز اختتام کو پہنچ گیا، جہاں میزبان ٹیم نے اپنی دوسری اننگز میں 7 وکٹوں کے نقصان پر 126 رنز بنا کر مجموعی طور پر 155 رنز کی برتری حاصل کر لی ہے۔
تیسرے روز پاکستان نے اپنی پہلی اننگز 199 رنز 3 کھلاڑی آؤٹ سے دوبارہ شروع کی، تاہم شان مسعود کے علاوہ کوئی بھی بیٹر بڑی اننگز نہ کھیل سکا۔
شان مسعود نے شاندار بیٹنگ کرتے ہوئے 109 رنز اسکور کیے، جبکہ سلمان علی آغا 20، محمد رضوان 12، عامر جمال 3، علی عثمان صفر، خرم شہزاد 19 اور محمد عباس بغیر کوئی رن بنائے آؤٹ ہوئے۔ پاکستان کی پوری ٹیم 282 رنز پر آؤٹ ہوگئی اور پہلی اننگز میں 29 رنز کے خسارے کا سامنا کرنا پڑا۔
ویسٹ انڈیز کی جانب سے جسٹن گریوز نے عمدہ بولنگ کرتے ہوئے 5 وکٹیں حاصل کیں۔
دوسری اننگز میں ویسٹ انڈیز کا آغاز بھی مشکلات کا شکار رہا اور اس کی 4 وکٹیں صرف 43 رنز پر گر گئیں۔
بعد ازاں تاگی نارائن چندر پال 35 رنز بنا کر آؤٹ ہوئے، جسٹن گریوز نے 20 اور کپتان روسٹن چیس نے 5 رنز اسکور کیے۔
تیسرے روز کھیل کے اختتام پر ویسٹ انڈیز نے 7 وکٹوں کے نقصان پر 126 رنز بنا لیے ہیں۔ شیمار جوزف 22 اور کیمار روچ 5 رنز کے ساتھ کریز پر موجود ہیں، جبکہ میزبان ٹیم کو مجموعی طور پر 155 رنز کی برتری حاصل ہے۔
پاکستان کی جانب سے دوسری اننگز میں محمد عباس نے 3 وکٹیں حاصل کیں، جبکہ خرم شہزاد نے ایک کھلاڑی کو آؤٹ کیا۔
