ویسٹ انڈیز نے تاروبا کے برائن لارا کرکٹ اکیڈمی میں کھیلے گئے پہلے ٹیسٹ میچ میں پاکستان کو 90 رنز سے شکست دے کر دو میچوں کی سیریز میں 1-0 کی برتری حاصل کر لی۔
211 رنز کے ہدف کے تعاقب میں پاکستان کی پوری ٹیم 120 رنز پر آؤٹ ہوگئی۔ دوسری اننگز میں قومی بیٹنگ لائن بری طرح ناکام رہی اور کپتان بابر اعظم کے سوا کوئی بھی بیٹر خاطر خواہ مزاحمت نہ کر سکا۔
بابر اعظم 58 رنز بنا کر ناٹ آؤٹ رہے، جبکہ اذان اویس، امام الحق اور شان مسعود 3، 3 رنز بنا کر پویلین لوٹے۔ علی عثمان 2 اور خرم شہزاد 4 رنز بنا سکے، جبکہ سلمان علی آغا، عامر جمال اور محمد علی بغیر کوئی رن بنائے آؤٹ ہوئے۔
اس سے قبل ویسٹ انڈیز نے چوتھے روز اپنی دوسری اننگز 126 رنز 7 وکٹوں سے دوبارہ شروع کی اور 181 رنز بنا کر آؤٹ ہوگئی۔ پہلی اننگز کی 29 رنز کی برتری کے باعث میزبان ٹیم نے پاکستان کو جیت کے لیے 211 رنز کا ہدف دیا۔
ویسٹ انڈیز نے پہلی اننگز میں 311 رنز اسکور کیے تھے، جہاں شے ہوپ نے 92 اور کیوم ہوج نے 84 رنز کی نمایاں اننگز کھیلیں۔ پاکستان کی جانب سے محمد علی نے 4 جبکہ محمد عباس نے 3 وکٹیں حاصل کیں۔
جواب میں پاکستان پہلی اننگز میں 282 رنز بنا سکا۔ شان مسعود نے 109 رنز کی شاندار سنچری اسکور کی جبکہ امام الحق نے 63 رنز بنائے۔ ویسٹ انڈیز کے جسٹن گریوز نے پہلی اننگز میں 5 وکٹیں حاصل کر کے اہم کردار ادا کیا۔
اس فتح کے ساتھ ویسٹ انڈیز نے دو ٹیسٹ میچوں کی سیریز میں 1-0 کی برتری حاصل کر لی۔
