اسلام آباد میں بارڈر ہیلتھ سروسز نے نیپاہ وائرس کے ممکنہ خدشے کے پیشِ نظر مختلف متعلقہ اداروں کو الرٹ جاری کر دیا ہے، تاکہ کسی بھی ہنگامی صورتحال سے بروقت نمٹا جا سکے۔ حکام کا کہنا ہے کہ اس وقت پاکستان میں نیپاہ وائرس کا خطرہ کم ہے اور اٹھائے گئے تمام اقدامات مکمل طور پر احتیاطی نوعیت کے ہیں۔
حکام کے مطابق بارڈر ہیلتھ سروسز نے اسپتالوں کو ہدایت جاری کی ہے کہ مشتبہ نیپاہ مریضوں کے لیے مخصوص بیڈز مختص کیے جائیں، جبکہ پمز اسپتال کو اسلام آباد ایئرپورٹ سے آنے والے ممکنہ مشتبہ نیپاہ کیسز کے لیے مکمل طور پر تیار رہنے کی ہدایت دی گئی ہے۔
حکام نے بتایا کہ ہوائی، بحری اور زمینی داخلی راستوں پر نیپاہ وائرس کے حوالے سے اسکریننگ اور نگرانی کے عمل کو مزید سخت کر دیا گیا ہے، جبکہ ایئرپورٹس اور بارڈر پوائنٹس پر فوکل پرسنز نامزد کرنے کی بھی ہدایات جاری کی گئی ہیں۔
حکام کے مطابق تمام صوبائی حکومتوں کو نیپاہ وائرس سے نمٹنے کے لیے تربیت یافتہ طبی عملہ اور مؤثر ریفرل سسٹم یقینی بنانے کا حکم دیا گیا ہے، تاکہ مشتبہ کیسز کی بروقت تشخیص اور علاج ممکن بنایا جا سکے۔
اس کے علاوہ ڈی ایچ او اسلام آباد کو مشتبہ نیپاہ مریضوں کے لیے خصوصی ایمبولینس مختص کرنے اور نیپاہ کے مشتبہ مریضوں کے قریبی رابطوں کی 21 دن تک نگرانی کرنے کی ہدایت بھی جاری کی گئی ہے۔
