ہندی اور مراٹھی فلموں کے معروف اداکار نانا پاٹیکر 75 برس کی عمر میں انتقال کرگئے۔ بھارتی میڈیا کے مطابق انہیں جمعرات کی صبح گوا کے ایک نجی اسپتال لایا گیا، جہاں ڈاکٹروں نے ان کی موت کی تصدیق کی۔
رپورٹس کے مطابق اداکار گوا میں اپنے فلیٹ میں شدید سینے کے درد کی شکایت کے بعد بے ہوش پائے گئے تھے۔ ابتدائی اطلاعات میں ان کے انتقال کو دل کا دورہ پڑنے سے منسوب کیا گیا ہے۔
بھارتی میڈیا نے ان کے بیٹے ملہار پاٹیکر کی فراہم کردہ معلومات کے حوالے سے بتایا کہ سینے میں شدید درد کی شکایت پر طبی ٹیم فلیٹ بھیجی گئی۔ ٹیم کے پہنچنے تک نانا پاٹیکر بے ہوش تھے، جس کے بعد انہیں فوری طور پر اسپتال منتقل کیا گیا۔ ڈاکٹروں نے صبح 5 بج کر 20 منٹ پر ان کی موت کی تصدیق کی۔
ابتدائی رپورٹس میں بتایا گیا کہ موت کی اصل وجہ معلوم کرنے کے لیے اسی روز پوسٹ مارٹم کیے جانے کا امکان ہے۔
نانا پاٹیکر کا اصل نام وشواناتھ پاٹیکر تھا۔ انہیں ہندی اور مراٹھی سنیما کے نمایاں اور قابل احترام اداکاروں میں شمار کیا جاتا تھا۔
انہوں نے 1978 میں فلمی سفر شروع کیا اور ’’پرندہ‘‘، ’’کرانتی ویر‘‘، ’’اگنی ساکشی‘‘، ’’خاموشی: دی میوزیکل‘‘، ’’اب تک چھپن‘‘ اور ’’ویلکم‘‘ سمیت متعدد فلموں میں یادگار کردار ادا کیے۔
ان کی فنی خدمات پر انہیں تین نیشنل فلم ایوارڈز ملے، جبکہ 2013 میں پدم شری کے اعزاز سے بھی نوازا گیا۔
شاہ رخ خان نے سوشل میڈیا پر اپنے تعزیتی بیان میں نانا پاٹیکر کو یاد کرتے ہوئے کہا کہ وہ خوشامد نہیں کرتے تھے اور کسی کو خوش کرنے کے لیے اس کی پسند کی بات نہیں کہتے تھے، بلکہ وہ بات کرتے تھے جس کا سننا ضروری ہوتا تھا۔ شاہ رخ کے مطابق نانا ان سے محبت کرتے تھے اور وہ بھی ان سے بے حد محبت رکھتے تھے۔
اپنی پہلی ملاقات کا تذکرہ کرتے ہوئے شاہ رخ نے بتایا کہ نانا پاٹیکر کی شخصیت سے مرعوب ہوکر وہ جھجھک میں اپنے بالوں سے کھیلنے لگے تھے۔ نانا نے فوراً ان کا ہاتھ ہٹایا اور کہا کہ ہیرو کی طرح بال مت بناؤ، تم ایک اداکار ہو۔
شاہ رخ خان نے انہیں اپنا استاد، رہنما، ناقد اور دوست قرار دیا۔ ان کا کہنا تھا کہ نانا پاٹیکر کے جانے سے صرف فلمی دنیا نہیں بلکہ کروڑوں بھارتیوں اور دنیا بھر کے لوگوں کے دلوں میں ایسا خلا پیدا ہوا ہے جو کبھی پُر نہیں ہوسکے گا۔
انہوں نے کہا کہ وہ نانا کو بہت یاد کریں گے اور زندگی کے آخری لمحے تک ان کی یہ نصیحت دل میں محفوظ رکھیں گے کہ ہیرو بننے کی کوشش میں اپنے اندر کے اداکار کو نہ کھونا۔
شاہ رخ نے اپنے پیغام میں نانا پاٹیکر کی روح کے سکون اور اللہ کی رحمت کی دعا کی اور ان کے لیے اپنی محبت اور گہری کمی محسوس کرنے کا اظہار کیا۔
