محکمہ موسمیات نے پیشگوئی کی ہے کہ آئندہ چند روز کے دوران ملک کے بیشتر علاقوں میں موسم نہایت خشک اور شدید گرم رہنے کا امکان ہے، جب کہ بالائی علاقوں کشمیر اور گلگت بلتستان میں کہیں کہیں گرج چمک کے ساتھ بارش متوقع ہے جو مقامی موسم کو خوشگوار بنا سکتی ہے۔
محکمہ موسمیات کا کہنا ہے کہ وفاقی دارالحکومت اسلام آباد اور خیبرپختونخوا کے کئی اضلاع میں شدید گرمی کا راج رہے گا، جب کہ پنجاب، سندھ اور بلوچستان کے بیشتر علاقے بھی سخت گرم اور خشک موسم کی لپیٹ میں رہیں گے۔
ادارے کے مطابق ملک بھر میں گرمی کی شدت میں اضافہ ہوتا جا رہا ہے، اور عوام کو محسوس ہو رہا ہے جیسے سورج آگ برسا رہا ہو۔ درجہ حرارت میں نمایاں اضافے کے باعث شہریوں کو احتیاط برتنے کی ہدایت جاری کی گئی ہے۔
گزشتہ روز مختلف شہروں میں درجہ حرارت خطرناک حد تک بلند ریکارڈ کیا گیا: جیکب آباد اور دادو میں پارہ 47 ڈگری تک جا پہنچا، نواب شاہ اور سبی میں 46، حیدرآباد، لاڑکانہ اور سکھر میں 45 ڈگری ریکارڈ ہوا۔ اس کے علاوہ پشاور اور ڈیرہ غازی خان میں 42، اسلام آباد میں 41، کوئٹہ میں 40 اور کراچی میں درجہ حرارت 35 ڈگری سینٹی گریڈ تک پہنچا۔
