آسٹریلیا کے خلاف آئندہ ون ڈے سیریز میں پاکستان کے تجربہ کار وکٹ کیپر اور سابق کپتان محمد رضوان کو ٹیم سے ڈراپ کیے جانے کا امکان ظاہر کیا جا رہا ہے، جبکہ نئے وکٹ کیپرز کو آزمانے پر غور جاری ہے۔
اطلاعات کے مطابق آسٹریلیا کے خلاف تین ون ڈے میچوں کی سیریز کے لیے سلیکشن کمیٹی، ہیڈ کوچ مائیک ہیسن اور کپتان شاہین شاہ آفریدی کے درمیان مشاورت کے بعد ٹیم کو حتمی شکل دی جا رہی ہے، جس میں محمد رضوان کی شمولیت کے امکانات کم دکھائی دے رہے ہیں۔
ذرائع کا کہنا ہے کہ مائیک ہیسن ٹی ٹوئنٹی کے بعد ون ڈے فارمیٹ میں بھی محمد رضوان کو شامل کرنے کے حق میں نہیں ہیں، جبکہ ٹیم مینجمنٹ مستقبل کے لیے نئے کمبی نیشنز آزمانا چاہتی ہے۔
33 سالہ محمد رضوان نے اب تک 103 ون ڈے میچز میں پاکستان کی نمائندگی کرتے ہوئے 40.08 کی اوسط سے 2979 رنز بنائے ہیں، جن میں 4 سنچریاں اور 19 نصف سنچریاں شامل ہیں۔
بطور وکٹ کیپر انہوں نے 113 کیچز اور 7 اسٹمپنگز بھی کی ہیں، جبکہ مارچ 2026 میں بنگلا دیش کے خلاف تین ون ڈے میچوں کی سیریز میں انہوں نے مجموعی طور پر 58 رنز اسکور کیے تھے۔
رپورٹس کے مطابق بنگلا دیش کے خلاف 15 مارچ 2026 کو تیسرے ون ڈے میں بطور بیٹر ڈیبیو کرنے والے غازی غوری کو بھی زیر غور لایا جا رہا ہے، جبکہ ان کے ساتھ دوسرے وکٹ کیپر کے طور پر عثمان خان یا مرزا سعد بیگ میں سے کسی ایک کو موقع دیے جانے کا امکان ہے۔
واضح رہے کہ آسٹریلوی ٹیم 23 مئی کو اسلام آباد پہنچے گی، جبکہ پاکستان ٹیم 22 مئی سے راولپنڈی میں تربیتی کیمپ شروع کرے گی اور ایک پریکٹس میچ بھی کھیلے گی۔
پاکستان اور آسٹریلیا کے درمیان ون ڈے سیریز کے میچز 30 مئی، 2 جون اور 4 جون کو کھیلے جائیں گے۔
