محکمہ موسمیات نے پیشگوئی کی ہے کہ آج سے 5 جون تک پنجاب کے بیشتر اضلاع میں آندھی اور بارش کا امکان ہے، جبکہ بعض علاقوں میں موسلا دھار بارش اور ژالہ باری بھی ہو سکتی ہے۔
محکمہ موسمیات کے مطابق مغربی ہواؤں کا نیا سلسلہ آج ملک کے بالائی علاقوں میں داخل ہوگا، جس کے اثرات کے باعث پنجاب کے مختلف شہروں میں موسم تبدیل ہونے کی توقع ہے۔
محکمے کا کہنا ہے کہ پنجاب کے متعدد مقامات پر تیز ہواؤں، گرد آلود آندھی اور گرج چمک کے ساتھ بارش کا امکان موجود ہے، جبکہ چند علاقوں میں موسلا دھار بارش اور ژالہ باری بھی ہو سکتی ہے۔
دوسری جانب خیبر پختونخوا میں شدید گرمی کے باعث گلیشیائی جھیلوں کے پھٹنے اور مقامی سطح پر سیلابی صورتحال پیدا ہونے کا خدشہ ظاہر کیا گیا ہے۔
اس صورتحال کے پیش نظر پی ڈی ایم اے نے چترال، دیر، سوات، کوہستان اور مانسہرہ کے لیے الرٹ جاری کر دیا ہے اور متعلقہ اداروں کو ہنگامی اقدامات یقینی بنانے کی ہدایت کی گئی ہے۔
حکام نے شہریوں سے اپیل کی ہے کہ خراب موسم کے دوران غیر ضروری سفر سے گریز کریں اور موسمی صورتحال سے متعلق سرکاری ہدایات پر عمل کریں۔
