کراچی: معروف اداکار، صدا کار اور ہدایت کار طلعت حسین کی نماز جنازہ ادا، سپرد خاک کردیا گیا۔ سینئر اداکار طلعت حسین کی تدفیق ڈیفنس فیز 8 کے قبرستان میں کی گئی۔ قبل ازیں ان کی نماز جنازہ مسجد عائشہ ڈیفنس فیز 8 میں اداکی گئی،جس میں رشتہ داروں ، دوستوں اور شوبز شخصیات نے شرکت کی۔
پاکستان شوبز انڈسٹری کے معروف اداکار طلعت حسین طویل علالت کے بعد 83 برس کی عمر میں گزشتہ روز انتقال کرگئے لیکن وہ اپنی بے مثال اداکاری کی وجہ سے مداحوں کے دلوں میں ہمیشہ زندہ رہیں گے۔
طلعت حسین کے انتقال کی افسوسناک خبر ان کی صاحبزادی تزین حسین نے اپنے آفیشل انسٹاگرام ہینڈل کی پوسٹ کے ذریعے دی۔ تزین حسین نے اپنے انسٹاگرام ہینڈل پر والد طلعت حسین کی تصویر پوسٹ کرتے ہوئے کہا کہ میں گہرے رنج و غم کے ساتھ یہ اعلان کررہی ہوں کہ میرے پیارے والد طلعت حسین صاحب خالقِ حقیقی سے جا ملے ہیں۔ا نہوں نے مداحوں سے اپیل کرتے ہوئے کہا کہ میرے والد طلعت حسین کی مغفرت کیلئے دعا کریں۔
