آسٹریلیا کی کرکٹ ٹیم کو ایک بڑا دھچکا لگا ہے، کیونکہ مایہ ناز آل راؤنڈر گلین میکسویل نیوزی لینڈ کے خلاف ٹی ٹوئنٹی سیریز سے باہر ہو گئے ہیں۔ کرکٹ ویب سائٹ کی رپورٹ کے مطابق 36 سالہ اسٹار آل راؤنڈر کو نیٹس پریکٹس کے دوران چوٹ لگی جس کے نتیجے میں ان کی دائیں کلائی کی ہڈی فریکچر ہو گئی۔ چوٹ کے باعث انہیں فوری طور پر وطن واپس بھیج دیا گیا ہے جہاں وہ آنے والے دنوں میں ماہر ڈاکٹروں سے رجوع کریں گے۔
ٹیم ذرائع کا کہنا ہے کہ انہیں جلد صحتیابی کی امید ہے، مگر بھارت کے خلاف اکتوبر کے آخر میں شروع ہونے والی ہوم سیریز میں ان کی شرکت مشکوک ہے۔کرکٹ آسٹریلیا (سی اے)نے وکٹ کیپر بیٹر جوش فلپ کو سکواڈ میں شامل کر لیا ہے تاکہ موجودہ وکٹ کیپر ایلکس کیری کے زخمی ہونے کی صورت میں متبادل موجود ہو۔ واضح رہے کہ فلپ کو اس سے قبل جوش انگلس کے ان فٹ ہونے پر بھی سکواڈ میں شامل کیے جانے پر غور کیا گیا تھا، لیکن ترجیح ایلکس کیری کو دی گئی.
۔گلین میکسویل کی غیر موجودگی کے ساتھ ساتھ آسٹریلیا کو پہلے ہی کئی اہم کھلاڑیوں کی خدمات حاصل نہیں ہوں گی ۔جوش انگلس پنڈلی کی چوٹ،پیٹ کمنز کمر کی درد،کیمرون گرین شیلڈ کرکٹ کے باعث آرام پر ہیں اورنیتھن ایلس بچے کی پیدائش کے باعث غیر حاضر ہیں۔آسٹریلیا کے لیے یہ سیریز اور آئندہ بھارت کے خلاف میچز 2026 کے ٹی 20 ورلڈ کپ کی تیاریوں کے لیے نہایت اہم ہیں۔
گلین میکسویل اور جوش انگلس جیسے متحرک کھلاڑیوں کی غیر موجودگی سے ٹیم کمبی نیشن پر اثر پڑنے کا خدشہ ہے۔واضح رہے کہ نیوزی لینڈ اور آسٹریلیا کی کرکٹ ٹیموں کے درمیان تین ٹی ٹونٹی میچوں کی سیریز کا پہلا میچ یکم اکتوبر کو کھیلا جائے گا۔
