انٹرنیشنل کرکٹ کونسل (آئی سی سی) نے پلیئرز کی نئی ٹی ٹوئنٹی رینکنگ جاری کر دی ہے، جس میں پاکستان کے صائم ایوب نے شاندار ترقی کے ساتھ دنیا کے نمبر ون آل راؤنڈر کا مقام حاصل کر لیا ہے۔
رینکنگ کے مطابق صائم ایوب 4 درجے ترقی کے بعد پہلی پوزیشن پر پہنچ گئے ہیں، انہوں نے بھارت کے ہاردک پانڈیا کو پیچھے چھوڑ کر یہ اعزاز اپنے نام کیا۔ قومی آل راؤنڈر محمد نواز بھی 4 درجے بہتری کے بعد 13 ویں نمبر پر آ گئے ہیں۔
بیٹرز کی رینکنگ میں بھارت کے ابھیشک شرما بدستور پہلے نمبر پر موجود ہیں، جبکہ سری لنکا کے پاتھم نسانکا 2 درجے بہتری کے بعد پانچویں پوزیشن پر آگئے ہیں۔
بھارتی کپتان سوریا کمار یادیو 2 درجے تنزلی کے بعد آٹھویں نمبر پر چلے گئے۔ پاکستان کے صاحبزادہ فرحان نے شاندار کارکردگی دکھا کر 11 درجے ترقی پائی اور 13 ویں نمبر پر پہنچ گئے۔ اس کے برعکس بابر اعظم 2 درجے نیچے ہو کر 37 ویں اور محمد رضوان 3 درجے تنزلی کے بعد 41 ویں نمبر پر آ گئے ہیں۔
پاکستان کے فہیم اشرف بھی 4 درجے بہتری کے ساتھ 35 ویں پوزیشن پر پہنچ گئے ہیں۔ بولرز کی رینکنگ میں بھارت کے ورون چکرورتی بدستور پہلے نمبر پر ہیں، جبکہ پاکستان کے ابرار احمد 3 درجے تنزلی کے بعد ساتویں نمبر پر آگئے ہیں۔
بھارت کے کلدیپ یادیو نے 9 درجے لمبی چھلانگ لگا کر 12 ویں پوزیشن حاصل کی۔ پاکستان کے شاہین شاہ آفریدی بھی 12 درجے ترقی کے بعد 14 ویں نمبر پر آگئے، جبکہ سفیان مقیم 3 درجے تنزلی کے ساتھ 19 ویں پوزیشن پر جا پہنچے۔
بھارتی فاسٹ بولر جسپریت بمرا 12 درجے ترقی کے بعد 29 ویں نمبر پر آگئے ہیں، جبکہ پاکستان کے حارث رؤف 5 درجے تنزلی کے بعد 33 ویں پوزیشن پر چلے گئے۔
