صدر مملکت آصف علی زرداری اور وزیر اعظم پاکستان شہباز شریف نے نئے سال کے موقع پر قوم کو دلی مبارکباد پیش کرتے ہوئے اس امید کا اظہار کیا ہے کہ آنے والا سال ملک کے لیے ترقی، خوشحالی اور مجموعی استحکام کا باعث بنے گا۔
صدر مملکت آصف علی زرداری نے نئے سال کے آغاز پر جاری اپنے پیغام میں کہا کہ پاکستان مختلف نوعیت کے چیلنجز سے محفوظ نہیں ہے، تاہم اس کے باوجود قوم کسی بھی صورت بے بس یا مایوس نہیں۔ انہوں نے واضح کیا کہ اگر اتحاد، استقامت، تخلیقی صلاحیت اور مضبوط یقین کو اپنایا جائے تو تمام مشکلات پر قابو پایا جا سکتا ہے۔
صدر مملکت نے مزید کہا کہ بحیثیت قوم اور پاکستان کے نگہبان ہونے کے ناطے ہم سب کو اپنی ذمہ داریوں کی تجدید کرنا ہوگی، تاکہ ملک کو درپیش اندرونی اور بیرونی چیلنجز کا مؤثر، سنجیدہ اور دانشمندانہ انداز میں مقابلہ کیا جا سکے۔
وزیر اعظم پاکستان شہباز شریف نے بھی تمام اہلیانِ وطن کو نئے سال کی مبارکباد دیتے ہوئے دعا کی کہ خدا کرے نیا سال پاکستان کے لیے خوشحالی، ترقی اور دیرپا استحکام کی نوید لے کر آئے اور عوام کی توقعات پر پورا اترے۔
وزیر اعظم کا کہنا تھا کہ سال 2025 دفاعِ وطن کے حوالے سے ملکی تاریخ میں سنہری حروف میں لکھا جائے گا، جبکہ پوری قوم بہادر افواج کے شانہ بشانہ کھڑی ہو کر ملک کے دفاع کے لیے سیسہ پلائی دیوار ثابت ہوگی اور ہر قربانی دینے کے لیے تیار رہے گی۔
