اسلام آباد: وفاقی وزیر قانون اعظم نذیر تارڑ نے کہا ہے کہ عمران خان کو جیل میں ان کی مرضی کے مطابق کھانا فراہم کیا جا رہا ہے اور ان کی صحت بالکل ٹھیک ہے۔ ان کا کہنا تھا کہ اس حوالے سے کسی قسم کی بے ضابطگی یا کوتاہی نہیں برتی جا رہی۔
قومی اسمبلی میں اظہار خیال کرتے ہوئے وزیر قانون نے بتایا کہ جیل سپرنٹنڈنٹ کو یہ اختیار حاصل ہوتا ہے کہ وہ قیدی کے رویے اور حالات کو مدنظر رکھتے ہوئے ملاقاتوں کا شیڈول طے کرے، جبکہ وفاقی حکومت کو یہ اختیار حاصل نہیں کہ وہ جیل حکام کو اس ضمن میں کوئی ہدایات جاری کرے۔
اعظم نذیر تارڑ نے کہا کہ اسپیکر قومی اسمبلی کو عمران خان سے متعلق تفصیلی رپورٹ فراہم کی جا چکی ہے، جس میں واضح کیا گیا ہے کہ انہیں ان کی پسند کا کھانا دیا جاتا ہے، تمام ضروری سہولیات میسر ہیں اور ان کی صحت تسلی بخش ہے، جبکہ ہر ہفتے ان کی اہلیہ سے ملاقات بھی کروائی جاتی ہے۔
انہوں نے مزید کہا کہ جیل مینول کے تحت مجرموں کو سیاسی معاملات پر گفتگو کی اجازت نہیں ہوتی، یہ معاملہ عدالت اور جیل انتظامیہ کے درمیان ہے، اور وہ اس حوالے سے مزید رپورٹ حاصل کر کے ایوان میں پیش کریں گے۔
