پاپ سنگر عالمگیر نے پاکستان اور بنگلا دیش کے درمیان تعلقات کی بحالی پر خوشی کا اظہارکرتے ہوئے کہا ہے کہ انہیں اس لمحے کا برسوں سے انتظار تھا۔
واضح رہے کہ 14 سال تک بند ہو جانے کے بعد پاکستان اور بنگلا دیش کے درمیان براہِ راست پروازیں دوبارہ بحال ہو گئی ہیں، جو دونوں ممالک کے تعلقات میں بہتری کا واضح اشارہ ہے۔
عالمگیر نے کہا، ’میں بنگالی ضرور ہوں لیکن ایک محب وطن پاکستانی بھی ہوں۔ پاکستان نے مجھے بے پناہ محبت دی ہے۔‘
عالمگیر نے اس بات پربھی خوشی کا اظہار کیا کہ 50 سال بعد بھی آج کا نوجوان ان کے گانے گنگنا رہا ہے۔
مزید گفتگو کرتے ہوئے عالمگیر نے نوجوان گلوکاروں کو مشورہ دیا کہ وہ کلاسیکی گائیکی سیکھ کر موسیقی کی مضبوط بنیاد رکھیں اور ساتھ ہی جدید ٹیکنالوجی کا استعمال کریں، تاکہ وہ ایسے یادگار اور دلکش گانے تخلیق کر سکیں جو طویل عرصے تک سننے والوں کے دلوں میں زندہ رہیں۔
