حکومتِ پاکستان نے قومی کرکٹ ٹیم کو آئی سی سی مینز ٹی ٹوئنٹی ورلڈکپ میں بھارت کے خلاف مقررہ میچ کھیلنے کی اجازت دے دی ہے۔
جاری کردہ اعلامیے کے مطابق پاکستان کرکٹ بورڈ کے چیئرمین محسن نقوی نے وزیرِ اعظم شہباز شریف کو باضابطہ طور پر پی سی بی، آئی سی سی اور بنگلا دیش کرکٹ بورڈ کے نمائندوں کے درمیان ہونے والے اعلیٰ سطح کے مذاکرات کے نتائج سے تفصیل کے ساتھ آگاہ کیا۔
اعلامیے میں بتایا گیا کہ حکومتِ پاکستان نے بنگلا دیش کرکٹ بورڈ کی جانب سے پی سی بی کو ارسال کی گئی باضابطہ درخواستوں کا بھی جائزہ لیا، جبکہ اس کے ساتھ ساتھ سری لنکا، متحدہ عرب امارات اور دیگر رکن ممالک کی جانب سے موصول ہونے والے پیغامات پر بھی غور کیا گیا۔ ان مراسلات میں پاکستان سے درپیش حالیہ چیلنجز کے حل میں مثبت کردار ادا کرنے کی درخواست کی گئی تھی۔
اعلامیے کے مطابق حکومت نے بنگلا دیش کرکٹ بورڈ کے صدر امین الاسلام کے بیان کو بھی نوٹ کیا، اور پاکستان نے برادر ملک بنگلا دیش کی جانب سے اظہارِ تشکر کو گرمجوشی اور خلوص کے ساتھ قبول کیا ہے۔ حکومتِ پاکستان نے اس عزم کا اعادہ کیا کہ پاکستان ہمیشہ بنگلا دیش کے شانہ بشانہ کھڑا رہے گا۔
اعلامیے میں مزید بتایا گیا کہ آج شام وزیرِ اعظم شہباز شریف اور سری لنکن صدر کے درمیان ٹیلی فونک گفتگو ہوئی، جس میں خوشگوار اور دوستانہ ماحول میں دونوں رہنماؤں نے اس حقیقت کو یاد کیا کہ پاکستان اور سری لنکا ہمیشہ خصوصاً مشکل اوقات میں ایک دوسرے کے ساتھ کھڑے رہے ہیں۔ سری لنکن صدر نے وزیرِ اعظم سے موجودہ معاملے کو خوش اسلوبی اور تدبر کے ساتھ حل کرنے کے لیے سنجیدہ غور و فکر کی درخواست کی۔
دوست ممالک کی درخواستوں کو مدنظر رکھتے ہوئے حکومتِ پاکستان نے ہدایت جاری کی کہ پاکستان قومی کرکٹ ٹیم 15 فروری 2026 کو آئی سی سی مینز ٹی ٹوئنٹی ورلڈکپ کے اپنے طے شدہ میچ میں شرکت کرے۔
اعلامیے میں کہا گیا کہ یہ فیصلہ کرکٹ کی روح کے تحفظ، کھیل کے فروغ اور عالمی اسپورٹس روایات کو برقرار رکھنے کے لیے کیا گیا ہے، جبکہ حکومتِ پاکستان نے وزیرِ اعظم اور پوری قوم کی جانب سے گرین شرٹس کے لیے نیک تمناؤں کا اظہار بھی کیا ہے۔
