کراچی: وزیراعلیٰ سندھ مراد علی شاہ نے اعلان کیا ہے کہ محکمہ ایکسائز کی ویب سائٹ پر رجسٹرڈ موٹر سائیکل مالکان 2 ہزار روپے کی پیٹرول سبسڈی حاصل کرنے کے لیے آن لائن درخواست دے سکتے ہیں، اور اس سہولت کا باقاعدہ آغاز کر دیا گیا ہے۔
کراچی میں پریس کانفرنس کرتے ہوئے انہوں نے کہا کہ یہ سبسڈی صرف رجسٹرڈ موٹر سائیکل مالکان کو فراہم کی جائے گی، جبکہ صارفین اپنی رجسٹریشن کی تفصیلات محکمہ ایکسائز اینڈ ٹیکسیشن کی ویب سائٹ پر چیک کر سکتے ہیں۔
مراد علی شاہ نے بتایا کہ اگر کوئی شہری اپنی موٹر سائیکل اپنے نام منتقل کرنا چاہتا ہے تو اس کی فیس ختم کر دی گئی ہے، جبکہ محکمہ ایکسائز کے دفاتر صبح سے رات تک کھلے رہیں گے اور ہفتہ و اتوار کو بھی منتقلی کی سہولت دستیاب ہوگی۔
انہوں نے کہا کہ اس سبسڈی کی رقم خودکار نظام کے تحت براہ راست صارف کے بینک اکاؤنٹ میں منتقل کی جائے گی، تاہم اس کے لیے ضروری ہے کہ موٹر سائیکل اور بینک اکاؤنٹ دونوں صارف کے اپنے نام پر ہوں۔
وزیراعلیٰ سندھ کے مطابق صوبے میں 6.7 ملین رجسٹرڈ موٹر سائیکلیں موجود ہیں، اور یقین دہانی کرائی گئی ہے کہ اپریل کے دوران 2 ہزار روپے کی سبسڈی فراہم کر دی جائے گی، جبکہ ایک فرد کے نام پر ایک سے زائد موٹر سائیکل ہونے کی صورت میں صرف ایک سبسڈی دی جائے گی۔
انہوں نے مزید وضاحت کی کہ درخواست کے لیے شہریوں کو ویب سائٹ پر اپنا شناختی کارڈ نمبر اور موٹر سائیکل کا رجسٹریشن نمبر درج کرنا ہوگا، جس کے بعد تصدیقی کوڈ موبائل پر موصول ہوگا، اور اس کے اندراج کے بعد بینک اکاؤنٹ نمبر فراہم کرنا ہوگا تاکہ سبسڈی کی رقم براہ راست منتقل کی جا سکے۔
ٹرانسپورٹرز کی جانب سے کرایوں میں اضافے کے حوالے سے سوال کے جواب میں مراد علی شاہ نے کہا کہ تمام ٹرانسپورٹرز سے بات چیت کی گئی ہے اور انہوں نے کرایہ نہ بڑھانے کی یقین دہانی کرائی ہے، جبکہ زائد کرایہ وصول کرنا جرم ہوگا اور اس کے خلاف کارروائی کی جائے گی۔
انہوں نے کہا کہ حکومت ٹرانسپورٹرز کو رقم دینے کے بجائے براہ راست عوام کو ریلیف فراہم کر رہی ہے، اور سبسڈی کو مستحق افراد تک پہنچانا ترجیح ہے۔
