کندھ کوٹ کے رہائشی نوجوان جبار سبزوئی کے حیدرآباد میں پولیس مقابلے کے دوران ہلاک ہونے کی اطلاع سامنے آئی ہے۔
پولیس ذرائع کے مطابق، حیدرآباد میں گزشتہ رات ایک مبینہ مقابلے کے دوران چار افراد مارے گئے، جن میں ایک کی شناخت جبار سبزوئی کے طور پر کی جا رہی ہے۔ پولیس کا مؤقف ہے کہ کارروائی جرائم پیشہ افراد کے خلاف کی گئی، جبکہ واقعے کی مزید تحقیقات جاری ہیں۔
دوسری جانب، مقتول کے ورثاء کا کہنا ہے کہ جبار سبزوئی کو چند روز قبل کندھ کوٹ سے پولیس نے گرفتار کیا تھا اور اسے جعلی مقابلے میں قتل کیا گیا ہے۔ انہوں نے واقعے کو مشکوک قرار دیتے ہوئے اعلیٰ حکام سے انصاف کا مطالبہ کیا ہے۔
ورثاء نے سندھ پولیس کے سربراہ آئی جی سندھ پولیس سے واقعے کی شفاف انکوائری کرانے اور ذمہ داروں کے خلاف کارروائی کی اپیل کی ہے۔
.واقعے کے بعد علاقے میں بے چینی پائی جا رہی ہے، جبکہ مزید تفصیلات سامنے آنے کا انتظار ہے
