وفاقی وزیر برائے دفاعی پیداوار رضا حیات ہراج نے کہا ہے کہ وہ کئی برسوں سے نئے صوبوں کے قیام کے حامی رہے ہیں اور ان کے مطابق نئے انتظامی یونٹس کے قیام سے وفاق مزید مضبوط ہوگا۔
اپنے بیان میں رضا حیات ہراج نے وفاقی وزیرِ داخلہ محسن نقوی کے حالیہ بیان کی حمایت کرتے ہوئے کہا کہ نئے انتظامی یونٹس کے قیام سے گورننس کے نظام کو بہتر بنانے میں مدد ملے گی اور مختلف علاقوں کے مسائل زیادہ مؤثر انداز میں حل کیے جا سکیں گے۔
انہوں نے کہا کہ نئے صوبوں کے قیام سے انتظامی معاملات میں بہتری آئے گی اور عوام کو سہولتیں فراہم کرنے کے عمل میں تیزی پیدا ہوگی۔ ان کے مطابق نئے صوبوں کے قیام کے حوالے سے محسن نقوی نے درست مؤقف اختیار کیا ہے۔
وفاقی وزیر نے مزید کہا کہ وزیراعظم شہباز شریف کی قیادت میں نئے صوبوں کے قیام کے معاملے پر پیش رفت کی جا سکتی ہے۔
دوسری جانب پاکستان تحریکِ انصاف کے چیف وہپ ملک عامر ڈوگر نے بھی نئے صوبوں کے قیام کی حمایت کرتے ہوئے کہا کہ جنوبی پنجاب کے الگ صوبے کے قیام پر وسیع اتفاقِ رائے موجود ہے۔
ان کا کہنا تھا کہ جنوبی پنجاب کے عوام کی محرومیوں کے خاتمے اور خطے کی ترقی کے لیے نئے صوبے کا قیام ضروری ہے اور مستقبل میں آبادی کی بنیاد پر مزید انتظامی یونٹس بھی قائم کیے جا سکتے ہیں۔
پاکستان پیپلز پارٹی کے رکنِ قومی اسمبلی آغا رفیع اللہ نے کہا کہ جنوبی پنجاب کے صوبے سے متعلق قرارداد پہلے ہی اسمبلی سے دو تہائی اکثریت کے ساتھ منظور ہو چکی ہے۔ ان کے مطابق آئین میں صوبوں کی حدود میں تبدیلی کے لیے متعلقہ صوبائی اسمبلی کی منظوری کو لازمی قرار دیا گیا ہے۔
اس معاملے پر دیگر سیاسی جماعتوں کی جانب سے مختلف آرا سامنے آ رہی ہیں اور اس حوالے سے سیاسی بحث جاری ہے۔
