برطانوی حکومت نے حوثی باغیوں کے بڑھتے ہوئے حملوں کے مقابلے میں سعودی عرب کے دفاع میں مدد کے لیے لڑاکا طیارے تعینات کرنے کا اعلان کیا ہے۔
برطانوی وزارتِ دفاع کے جاری کردہ بیان کے مطابق یہ تعیناتی سعودی عرب کو فراہم کیے جانے والے ’’اضافی دفاعی فوجی تعاون‘‘ کا حصہ ہے۔
وزارت نے کہا کہ رائل ایئر فورس کے ٹائفون لڑاکا طیارے سعودی شہروں اور اہم قومی بنیادی ڈھانچے کو فضائی حملوں سے محفوظ رکھنے کے لیے دفاعی فضائی مشنز انجام دیں گے۔
بیان میں کہا گیا ہے کہ طیاروں کا کردار مکمل طور پر دفاعی ہوگا اور وہ حوثیوں کے خلاف کسی جارحانہ کارروائی میں حصہ نہیں لیں گے۔ اس کے ساتھ سعودی عرب کے اندر دفاعی سازوسامان کی منتقلی میں مدد کے لیے ایک فوجی ٹرانسپورٹ طیارہ بھی تعینات کیا جائے گا، جبکہ سعودی افسران کی معاونت کے لیے برطانوی فوجی مشیر بھی بھیجے جائیں گے۔
برطانوی وزیرِ دفاع ویس اسٹریٹنگ نے اپنے بیان میں کہا کہ ان کے اتحادی سعودی عرب پر حوثیوں کے مسلسل حملے انتہائی قابلِ مذمت ہیں۔ انہوں نے کہا کہ بالخصوص ریاض ایئرپورٹ کو نشانہ بنانا ظاہر کرتا ہے کہ حوثی خطے میں کشیدگی بڑھانے کے لیے کس حد تک جا رہے ہیں۔
