الیکشن کمیشن آف پاکستان نے اعلان کیا ہے کہ شبلی فراز کی نااہلی کے باعث خالی ہونے والی سینیٹ نشست پر انتخاب کل منعقد ہوگا۔
تفصیلات کے مطابق، الیکشن کمیشن نے بتایا کہ سینیٹ کی یہ خالی نشست خیبرپختونخوا سے ہے اور اس پر ووٹنگ کل خیبرپختونخوا اسمبلی میں صبح 9 بجے سے شام 4 بجے تک جاری رہے گی۔ پاکستان تحریک انصاف (پی ٹی آئی) کی جانب سے خرم شہزاد امیدوار نامزد کیے گئے ہیں، جب کہ پاکستان پیپلز پارٹی کے نثار خان اور تین آزاد امیدوار بھی انتخابی میدان میں موجود ہیں۔
یاد رہے کہ 5 اگست 2025 کو الیکشن کمیشن آف پاکستان نے سینیٹ میں قائدِ حزبِ اختلاف شبلی فراز، قومی اسمبلی میں اپوزیشن لیڈر عمر ایوب اور دیگر آٹھ ارکان کو نااہل قرار دیا تھا۔
الیکشن کمیشن نے تمام نااہل قرار دیے گئے ارکان کو ڈی سیٹ کرنے کا نوٹیفکیشن بھی جاری کیا تھا۔ ان ارکان کو 9 مئی کے مقدمات میں سزائیں سنائے جانے کے بعد نااہل قرار دیا گیا۔
نااہل قرار پانے والوں میں ایک سینیٹر، پانچ ارکانِ قومی اسمبلی اور تین ارکانِ پنجاب اسمبلی شامل تھے۔ ان میں سینیٹ اور قومی اسمبلی کے اپوزیشن لیڈرز شبلی فراز، عمر ایوب کے علاوہ حامد رضا، رائے حیدر، رائے حسن، رائے مرتضیٰ، زرتاج گل، انصر اقبال اور جنید افضل شامل ہیں۔
چند روز قبل فیصل آباد کی انسدادِ دہشت گردی عدالت نے 9 مئی کے تین مقدمات میں عمر ایوب، شبلی فراز، زرتاج گل وزیر اور پاکستان تحریک انصاف کے دیگر 196 رہنماؤں اور کارکنوں کو 10 سال تک قید کی سزائیں سنائی تھیں۔
