پاکستان انٹرنیشنل فلم فیسٹیول کل سے شروع ہوگا جس میں اینیمیٹد فلمیں میں دکھائی جائیں گی۔
تفصیلات کے مطابق کراچی فلم سوسائٹی کے بینر تلے پاکستان انٹرنیشنل فلم فیسٹیول کے زیر اہتمام 25 سے 27 اکتوبر کو کراچی میں فیسٹیول منعقد کیا جارہا ہے، جس کا فوکس اینی میٹیڈ فلموں پر ہوگا۔
فیسٹیول میں مختلف سرگرمیاں بشمول سیمینار، مباحثے، ورک شاپ اور فلم اسکریننگ کے علاوہ تین انٹرنیشنل پروڈکشنز کو پہلی بار پاکستان میں پیش کیا جائے گا۔
فیسٹیول کو محکمہ ثقافت برائے سندھ کا تعاون حاصل ہے۔ فیسٹیول کے پہلے روز ’پاکستان میں حرکت پذیری یعنی اینیمیشن کی صلاحیت، چینلجز اور مواقع‘ کے عنوان سے ایک اہم سیمینار منعقد کیا جائے گا۔ فلم ساز ثنا توصیف جنہوں نے2018 میں فلم ’ٹک ٹاک‘ تیار کی تھی اس سیمینار کی نظامت کریں گی۔ سیمینار کے مہمان وزیر اعلیٰ سندھ کے مشیر،وزیر قانون مرتضی وہاب ہوں گے۔
پینل میں ایمان فاروقی، دانیال نورانی، فلم ’دی ڈونکی کنگ ‘کے کریٹو ڈائریکٹر عزیز جندانی، ’باراجون‘ انٹرٹینمنٹ کے پروڈیوسر عارف جیلانی، عمران علی دینا اور’ برج‘ اینیمیشن اینڈ وی ایف ایکس کے آصف اقبال شامل ہیں۔
تین رو زہ پاکستان انٹرنیشنل فلم فیسٹیول میں چھ فلموں کی اسکریننگ کی جائے گی، جس میں ’بلال: اے نیو بریڈ آف ہیرو‘ جس کے پروڈیوسر عارف جیلانی ہیں، ’اللہ یار اور لیجنڈ آف مارخور‘ جس کے رائٹر، ڈائریکٹر اور پروڈیوسر عزیر ظہیر خان ہیں، ’میری اینڈ دی وچ فلاور‘، ’موڈیسٹ ہیروز‘، ’دی ڈونکی کنگ ‘ جو کہ عزیز جندانی کی ہدایت کاری میں بننے والی فلم ہے اور شرمین عبید چنائے کی ’تین بہادر: رائس آف دی وائریرز‘ شامل ہیں۔
اس موقع پر تین بین الاقوامی مختصر فلمیں بھی نمائش کے لیے پیش کی جائیں گی۔ فیسٹیول میں پیشہ ورانہ مہارت کے حامل افراد کے علاوہ طلباءاور پاکستان میں اینیمیشن سے متعلق جاننے والوں کی بڑی تعداد متوقع ہے
