سابق صدر آصف علی زرداری کا کہنا ہے کہ ملک اس وقت مشکل حالات سے گزر رہا ہے، ہم نے اس کو پہلے بچایا تھا اور اب بھی بچائیں گے۔
کہوٹہ میں جلسے سے خطاب میں آصف علی زرداری نے کہا کہ ملک بڑے بُرے حالات میں تھا اور شاید ہوگا۔ ہم اپنے ملک کو ان حالات سے نکالنا چاہتے ہیں، آپ کی دعاؤں سے پاکستان کو دوبارہ بنائیں گے۔
آصف علی زرداری نے کہا کہ ہر جگہ لوگ نکلے ہوئے ہیں اور جئے بھٹو کے نعرے لگ رہے تھے دل خوش ہوگیا، میں پہلا اعلان یہ کرتا ہوں کہ کہوٹہ کا راستہ بنواؤں گا کیونکہ کہوٹہ کے عوام کی تکالیف کا احساس ہے۔
انہوں نے کہا کہ مجھے ان درختوں اور پہاڑوں کا احساس ہے جو درخت ختم ہو رہے ہیں، اللہ نے طاقت دی تو ہم آپ کو گیس کی سہولت فراہم کریں گے، میں کہوٹہ کے علاقے میں میڈیکل کالج اور یونیورسٹی بنانا چاہتا ہوں۔
سابق صدر نے کہا کہ کہوٹہ میں اسپتال بنے گا تو علاج کی سہولتیں بڑھتی جائیں گی، ہر وہ چیز ہوگی جو عوام کی خواہش ہوگی۔
انہوں نے تنقید کی کہ اسلام آباد کو تو کچھ پتا ہی نہیں لگتا، ان کو تو یہی نہیں پتا کہ کہوٹہ کہاں ہے، میں پچپن سے کہوٹہ آتا رہا ہوں، میری بہن اور بیٹوں کو کامیاب کریں گے تو آپ سے اسلام آباد میں بھی ملاقات ہوگی۔