کوئٹہ میں بلدیاتی انتخابات کے شیڈول کا باضابطہ اعلان کردیا گیا ہے، جس کے بعد شہر کی 172 یونین کونسلز اور 641 وارڈز میں دسمبر میں ہونے والے انتخابات کی تیاریاں شروع کردی گئی ہیں۔ اس سلسلے میں ریٹرننگ افسران اور ڈسٹرکٹ ریٹرننگ افسران کے دفاتر کے باہر عوامی نوٹس بھی آویزاں کر دیے گئے ہیں، تاکہ شہری مکمل آگاہی حاصل کر سکیں۔
کاغذاتِ نامزدگی کی وصولی اور اجرا 13 سے 17 نومبر تک جاری رہے گا، جبکہ نامزد امیدواروں کے ناموں کی ابتدائی فہرست 18 نومبر کو شائع کی جائے گی۔ کاغذاتِ نامزدگی کی جانچ پڑتال کا عمل 19 سے 24 نومبر تک جاری رہے گا۔
کاغذاتِ نامزدگی کی منظوری یا مسترد کیے جانے کے خلاف اپیل دائر کرنے کی آخری تاریخ 28 نومبر مقرر کی گئی ہے، جبکہ اپیلٹ ٹربیونل کی جانب سے اپیلوں پر فیصلے 3 دسمبر تک سنائے جائیں گے۔
امیدواروں کی نظرثانی شدہ فہرست 4 دسمبر کو جاری کی جائے گی، جبکہ امیدواروں کی دستبرداری کے بعد نظرثانی شدہ حتمی فہرست 5 دسمبر کو دوبارہ شائع کی جائے گی۔
امیدواروں کی حتمی فہرست اور انتخابی نشان 6 دسمبر کو الاٹ کیے جائیں گے، جبکہ بلدیاتی انتخابات کے لیے پولنگ 28 دسمبر بروز اتوار کو منعقد ہوگی۔
